電影LOL︳《奇異女俠玩救宇宙》導演二人組唔拍片玩影相 向日本特攝片致敬

《奇異女俠玩救宇宙》橫掃影壇大獎，女主角楊紫瓊憑此獲得金球獎音樂/喜劇組影后殊榮，成績驕人。《奇》講述美國華僑秀蓮喺父親生日當天面對眾多煩心事，先要處理好洗衣店稅務問題，個女又突然話要同公公出櫃，阿老公又忽然神化，佢自己仲突然跌入多重宇宙得到多個身份！

楊紫瓊戲中化身大明星、功夫高人、手指係香腸嘅女同志等等，演繹多個角色，封后實至名歸！唔難發現戲內秀蓮每個化身其實向不同類型電影致敬，由《花樣年華》、《廿二世紀殺人網絡》到香港早期功夫武俠片都有，可見「Daniels」導演二人組（關家永及丹尼爾舒奈特 - Daniel Kwan and Daniel Scheinert)有幾愛電影，同時創意無限！

近日「雙丹導演」再次發揮創意，不過今次唔拍電影改為影相，同W 雜誌及艾美獎視后Jennifer Coolidge合作影咗輯非常搞怪好玩嘅相，本身好玩得勁多笑點嘅Jennifer都話今次合作好開心好盡興，直頭係事業生涯中最好嘅作品之一！

關家永及丹尼爾舒奈特坦言因為《奇》感受巨大壓力，所以借今次合作大玩特玩放鬆下。輯相以致敬日本怪獸片嘅「特攝」（Tokusatsu)出發，兩位導演提到日本「特攝」電影製作水準非常高，同時又睇得出好多手作痕跡，尢其60年代日本嘅「特攝」電影，從畫面中幾乎可見指紋，又睇得出怪獸係人扮嘅，但呢種唔完美反而比現時超高像真度嘅電腦特效更有吸引力。

今次請嚟Jennifer Coolidge著住特製高訂時裝，以誇張嘅造型化身「五色戰隊」及「鹹蛋超人」大反派，於手製實景中重現戰隊對陣場面，仲打贏埋超人，最搞笑係導演丹尼爾舒奈特都落場玩埋一份，輯相入面隻巨型龍蝦獸咪就係導演扮架囉！

更多電影文章

電影LOL 今期睇咩戲︳流水落花／鈴芽之旅／洛奇系列：王者之後3／海邊電影院／影陌／滿江紅

電影LOL︳戲院跑數新招 美國AMC院線出爆谷 層遞式票價 負評如潮

電影LOL︳《蟻俠》內地票房輸俾《毒舌大狀》《超級瑪利歐兄弟大電影》照攻中國市場

電影LOL︳楊紫瓊關繼威贏美國演員公會獎 奧斯卡勝算再提高？

電影LOL︳《玩轉腦朋友2》情緒專員大批湧現？Pixar幕後主腦爆︰最多有27個

電影LOL︳Hellboy漫改電影三度重啟 導演講明︰一定兒童不宜

電影LOL ︳荷里活新風向 商業秘辛拍成電影 《俄羅斯方塊》唔止打機咁簡單

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！