雅虎香港新聞 電影LOL︳《毒舌大狀》《超神經械劫案下》玩晒 賀歲檔竟然冇重磅西片落場
過幾日就係新年，幾年冇試過去戲院睇戲度歲，今年會唔會有少少掛住？今日同你點一點香港賀歲檔有咩新戲。
舊年港片大發圍，氣勢延續到今個賀歲檔。近幾年包辦賀歲冠軍嘅黃子華，今年以《毒舌大狀》出場，睇片名就估到套戲靠對白帶動，亦即係俾晒位子華神狂拋金句。而同片另一焦點可能係終於喺電影以主要角色出場嘅ERROR成員阿Dee(何啟華）。
而打對台嘅係《超神經械劫案下》，主角係好多年冇拍戲嘅張敬軒，配搭本身好friend而演出又好有爆炸力嘅王菀之，最聰明係mark到Jeffrey魏浚笙同洪嘉豪。唔止因佢地多人follow，佢2位做喜劇應該有估唔到嘅效果。
港產賀歲片仲有最後關頭殺出嘅《1人婚禮》。導演係《幻愛》嘅周冠威，大家都明點解冇幾多戲院上，相信唔少同路人會撐。而且從《幻愛》嘅質素睇，吸引觀眾入場嘅唔一定係電影以外嘅原因。
數完港片，然後到西片。往年總會有荷里活大片分一杯羹，今年居然冇！原因可能係《阿凡達》排咗12月上映，全世界（真係講緊環球電影市場）都避一避，去到2月先有Marvel嘅《蟻俠與黃蜂女 量子狂熱》。既然外國呢期都冇大片上，而今年又早咗過年，自然冇咩西片賀歲鉅獻。於是由MIRROR成員Edan（呂爵安）同Stanley（邱士縉）配音嘅動畫片《非常貓狗反轉武林》，成為唯一賀歲西片代表，但係相信唔少人入場係因為想聽Edan同大表哥配音，咁算唔算半套港產片？
係噃，真係仲有半套港產片未介紹，就係甄子丹執導兼主演嘅合拍片《天龍八部之喬峰傳》。有丹爺即係有打戲睇，仲有金像影后劉雅瑟，陣容都唔錯架。
更多電影文章
電影LOL 今期睇咩戲︳THE FIRST SLAM DUNK／人工殺姬／黐GUN婚禮／兒子可否不要走
電影LOL︳先贏劉德華《流浪地球2》《無名》內地賀歲檔預售爆冷領先 唔關梁朝偉事？
電影LOL︳中女談情筍盤瘋狂埋身 Netflix情人節應節甜片《換屋假期》
電影LOL︳金球獎直擊《奇異女俠玩救宇宙》楊紫瓊首奪影后 關繼威贏男配角
電影LOL︳社畜生活實錄 網路漫畫《他馬克老闆》拍電影版 搵盧廣仲鬧爆你腦細
電影LOL︳《人工殺姬》未夠殺《阿凡達2》四週北美票房冠軍 全球收17億成史上賣座第7位
電影LOL︳2022香港票房十大 《明日戰記》成港產片王 《阿凡達︰水之道》18日收近億成亞軍
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
