雅虎香港新聞 電影LOL︳奧斯卡賽前預測 《奇異女俠玩救宇宙》橫掃大獎 楊紫瓊封后在望
今屆奧斯卡頒獎禮喺星期日舉行，對於亞洲地區、尤其是香港嘅觀眾而言，今年應該睇得特別肉緊，因為由楊紫瓊、關繼威等一班華裔演員主演嘅 《奇異女俠玩救宇宙》獲得最多提名，而且喺好幾個獎項都成為熱門？楊紫瓊會唔會成為首位華裔金像影后？戲中楊紫瓊「一家人」會唔會拎晒獎座返屋企？綜合小編同多間國際媒體嘅分析，即刻預測一下！
最佳男配角
外媒多數會以「邊個值得贏」同「邊個會贏」作出分析，而喺最佳男配角呢個獎方面，唔少外媒都認為《奇異女俠玩救宇宙》嘅關繼威，無論係「邊個值得贏」同「邊個會贏」2個方向都係首選。畢竟關繼威以戲份、對故事嘅重要性以至演出水準，都比起對手更加突出。一次過要演無用小男人、型爆特工、紳士首富仲要打鬥連場，早前各個大獎都對關予以肯定，應該直落掃埋奧斯卡冇難度。
最佳女配角
比起最佳男配角嘅一面倒，女配角就相當勢均力敵。《奇異女俠玩救宇宙》嘅許瑋倫（Stephanie Hsu ）同Jamie Lee Curtis雙雙入圍，後者更加喺奧斯卡評審投票期前後獲得演員工會獎，對於爭獎大有幫助。但論戲份同表現，許瑋倫其實都值得被考慮，因此有可能2位同片女星出現互相「界票」。《伊尼舍林的女妖》嘅Kerry Condon表現出色但輸在聲勢不足，另一熱門係《黑豹2：瓦干達萬歲》嘅Angela Bassett，佢喺今年「頒獎禮季節」早段跑出，金球獎同荷里活影評協會率先得獎，加上黑人演員近年都獲得評審肯定，我估Angela Bassett贏面稍勝Jamie Lee Curtis。
最佳導演
《奇異女俠玩救宇宙》嘅「雙Daniel」（Daniel Kwan關家永及Daniel Scheinert）喺導演公會及影評之選等頒獎禮上，都力壓另一大熱、執導《法貝曼︰造夢大師》嘅大導演史提芬史匹堡。要同時處理平行宇宙、家庭倫理、科幻以至打鬥場面難度極高，「雙Daniel」處理得宜兼且有條不紊，確實值得捧獎。
最佳男主角
因為《奇異女俠玩救宇宙》冇份爭呢個獎，令到影帝討論度稍遜，但實情競爭相當激烈！《伊尼舍林的女妖》嘅Colin Farrell同《貓王》嘅Austin Butler首先拎咗金球獎，外界以為今年應該係佢2個爭之際，增肥演出《鯨》嘅班頓費沙喺演員工會頒獎禮上稱帝，令佢近期聲勢急起直追。三位演員嘅演出水準不相伯仲，但係班頓費沙戲外嘅經歷（受性侵後絕跡幕前、由靚仔變中年發福被恥笑）等，加上增磅演出都夠晒說服力獲得評審手上嘅一票支持。
最佳女主角
楊紫瓊要封后？要問過Cate Blanchett先！TÁR 可以話係Cate Blanchett另一次渾然天成嘅個人表演，演活由名成利就到身敗名裂嘅過程，對上一次睇到咁精采嘅演員「單天保至尊」式演出，可能已經係Cate Blanchett上次拎影后嘅《情迷藍茉莉》。不過冇計，楊紫瓊以鋪天蓋地嘅氣勢行勻全個頒獎季，而且喺《奇異女俠玩救宇宙》中要跳出跳入唔同身份但又保持連貫都唔容易，我地可以等睇「瓊姐」上台啦。
最佳電影
荷里活四大組織－導演、編劇、監製及演員工會嘅頒獎禮，都將最佳電影頒畀《奇異女俠玩救宇宙》。淨係呢4個界別嘅奧斯卡評審人數已經佔過半數。而過往只有4套電影能夠有同樣成績，包括《美麗有罪》、《二百萬奪命奇案》、《一百萬零一夜》及《ARGO救參任務》，呢4套戲最終都成為奧斯卡最佳電影。加埋荷里活近年對亞裔電影人嘅支持，《奇異女俠玩救宇宙》幾乎冇得輸。唯一有機會挑戰一下嘅可能係英國電影大獎中獲最佳電影嘅《西線無戰事》，同埋甚有得獎格嘅《法貝曼︰造夢大師》。
更多電影文章
電影LOL 今期睇咩戲︳斷網／奪命狂呼6／65:絕境逃生／鯨／無名
電影LOL︳重啟版《忍者龜》動畫8月登場 搵Seth Rogen主理應該兒童不宜
電影LOL︳《洛奇外傳：王者之後3》全球3日收1億 創運動電影最高開畫紀錄
電影LOL︳《奇異女俠玩救宇宙》導演二人組唔拍片玩影相 向日本特攝片致敬
電影LOL︳戲院跑數新招 美國AMC院線出爆谷 層遞式票價 負評如潮
電影LOL︳《蟻俠》內地票房輸俾《毒舌大狀》《超級瑪利歐兄弟大電影》照攻中國市場
電影LOL︳楊紫瓊關繼威贏美國演員公會獎 奧斯卡勝算再提高？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
