雅虎香港新聞 電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳
《007：生死有時》男主角由丹尼爾基克（Daniel Craig）演出固然矚目，其中一位「邦女郎」安娜迪艾瑪絲（Ana De Armas）亦相當搶鏡。雖然戲份唔算多，不過出色嘅外型加上型格動作，輕易成為電影亮點，唔少影迷希望佢多啲戲份咁話。
呢位古巴女星於荷里活發展短短6年，已經由小配角變成荷里活女星，片約不斷，成為影壇搶手貨。《007》後安娜迪艾瑪絲會接演《復仇者聯盟》系列導演羅素兄弟，為Netflix耗資2億美金打造嘅鉅製《The Gray Man》，之後又會主演傳記片Blonde飾演一代尤物瑪麗蓮夢露。
最新消息Ana好大機會接拍《殺神John Wick》外傳Ballerina！《殺》系列大受歡迎，除咗奇洛李維斯會繼續主演正傳外，系列前傳劇集The Continental落實開拍，目前完成選角，而講述年輕女舞者為家人復仇嘅外傳Ballerina，落實由《活屍大軍》、《殺神3》嘅編劇Shay Hatten執筆劇本，並由《妖夜尋狼》導演Len Wiseman將會執導。
Ballerina角色喺《殺神3》中匆匆出場露個面，為開拍外傳鋪定路。電影預算5000－8000萬美金，比起超級英雄電影唔算鉅製，如果外傳貫徹《殺神》風格，以爽快動作場面見稱，故事聚焦於1、2個主角身上，呢個預算一啲都唔失禮！
奇洛李維斯暫時未確定會否參與Ballerina，不過Ana未紅時就已經同奇哥合作過《夜半女敲門》，仲同奇哥有火辣「多人運動」及浴室肉搏場面，雖然《夜》口碑參差，不過成功為Ana打開荷里活知名度，無耐就參與《銀翼殺神2049》。前年憑《神探白朗：福比利大宅謀殺案》飾演一講大話就嘔嘅看護Marta首次獲得金球獎最佳女主角提名，認真威水！
近年有唔少以女性主導嘅動作片，如《原子殺姬》（Atomic Blonde)、Maggie Q主演嘅《復仇殺姬》（The Protege）仲有《頭號殺姬》（Ava）同《薄荷殺姬》等無數殺姬，不過可惜暫時未有「殺姬」票房大賣或成功發展成系列，如果成功邀請到Ana成為《殺神》世界一員，憑佢嘅有外型有演技及觀眾緣，Ballerina或者有望殺出重圍？
更多電影文章
電影LOL︳今期睇咩戲 一級指控／馬達．蓮娜／蘇豪的最後一夜／淺田家／血魔獸／龍與雀斑公主
電影LOL︳迪士尼拍《波西傑克森》美劇 原作者親自執筆費事電影版又爛尾
電影LOL︳九把刀再執導 《月老》搵柯震東主演 再現《那些年》奇蹟？
電影LOL︳DC開拍《蝙蝠女》電影 最搶眼卡士係呢位暴肥前男神
電影LOL︳Barbie真人電影陣容越整越強 Ryan Gosling演真人版Ken
電影LOL︳Anson Lo盧瀚霆首部電影《假冒女團》男扮女裝兼著道士袍跳舞
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
