電影LOL︳為演路易十五 Johnny Depp變無鬚大媽 開工遲到激親導演

一向以型佬見稱嘅Johnny Depp，同前妻Amber Heard單離婚官司終於告一段落。打贏官司後Johnny Depp開演唱會又同處理官司嘅律師Joelle Rich拍拖，生活漸漸重回正軌，理應狀態回勇，不過早2個星期出席公開活動差啲認唔到佢。發福事少，佢剃咗鬚加埋把中長頭髮，竟然有少少大媽Feel！

好彩個無鬚新look只係新戲造型，提據外媒deadline獨家報導，Johnny Deep剃鬚係為咗新戲Jeanne Du Barry演路易十五一角！因為同Amber Heard嘅官司，Depp哥被荷里活冷落，已經好多年無拍過戲，復出頭炮就係呢部法國宮廷古裝片。

電影由法國女星Maïwenn執導，故事講述平民出身嘅Jeanne Du Barry以美貌及智慧，如何於18世紀嘅上流社會一步一步上位，最後成功俘虜路易十五嘅心，成為佢嘅愛妃，愛佢愛到無視禮節及規矩，俾Jeanne入主凡爾賽宮。

此片為Maïwenn第6部長片，同時亦有參與電影劇本創作仲會演埋一份！電影拍咗11個星期，部分仲係凡爾賽宮取景，完整還原18世紀法國宮廷！導演前作Polisse; My King 2011年獲得康城影展評審團獎，有Johnny Depp同康城得獎導演，未有成品睇已經成功賣出歐洲多個地區版權，認真威水！

Johnny Depp久休復出，影迷們應該最開心，不過小道消息指導演Maïwenn又唔多滿意自己個男主角，據聞因為Depp哥無咩時間觀念，Call 6點通告，全隊Crew埋哂位佢就無影，影響拍攝進度喎！Johnny Depp開工遲到時有聽聞，不過佢埋位又交到貨，演活唔少有血有肉嘅角色，所以繼續有戲拍。不過依家樣樣都要政治正確，唔知班片廠仲有無咁包容？