電影LOL︳網友炒GAMESTOP打大鱷拍成電影 下個月開鏡 最強卡士係個導演!

去年初美國股市嘅奇聞,一班喺「美國連登」REDDIT討論區炒股版嘅網友,發現佢地幫襯多年嘅電玩遊戲零售連鎖店GAMESTOP,俾一班華爾街大鱷做淡買跌搵食。巴打們不忿之餘,居然發現箇中破綻︰大行賣空股份數多過流通量,假如大行到期時唔夠貨歸還,就要喺市場掃貨補倉。於是網友發起STRONG HOLD挾倉行動叫大家入貨唔放,迫大行用高價接貨,懲罰呢種炒風之餘仲可以全民發達。結果幾數蚊雞一股嘅GAMESTOP,炒到上幾百蚊!!

好嘞,財經新聞講完。呢單新聞一出,唔少人都估實有片商將呢件事改編成電影。梗係啦,有晒起承轉合,齋聽新聞都有畫面,最緊要係……成個荷里活都冇橋!今年4月,已經有消息話,導演Craig Gillespie已經同美高梅簽約,執導講述呢次「網友打大鱷」事件嘅電影Dumb Money。而劇本會按Ben Mezrich以呢件事撰寫嘅小說改編。

Seth Rogen
Seth Rogen

去到今日,外媒Deadline報導,片商由美高梅變成近年冒起嘅Black Bear,今個月多倫多電影節會有賣片活動,下個月套戲正式開鏡。卡士方面聽落唔差,有新一套《蝙蝠俠》嘅謎語人Paul Nano、《索爆高低戀》(Long Shot)嘅肥仔笑匠Seth Rogen同埋Kim Kardarshian前男友Pete Davidson(人地好歹都係Saturday Night Live固定班底出身架喂),各種款式有齊,好切合網上咩人都有嘅實際狀況。而導演Craig Gillespie幫串流平台Hulu拍嘅劇集Pam & Tommy,係以90年代性感女星Pamela Anderson 同前男友Tommy Lee性愛影片流出事件為藍本,今年艾美獎有3項提名;2018年嘅《冰之驕女》更令Margot Robbie擺脫花瓶形象,故事都係震撼一時嘅花樣滑冰界醜聞,似乎搵佢拍呢類JUICY題材嘅故仔十分啱數!

Pam & Tommy劇照
Pam & Tommy劇照

更多電影文章

電影LOL 今期睇咩戲︳孤疑前傳/獸獵/三千年的渴望/一日,在片場打雜的我,俾老細叫去做導演/惡的序章/拜金女王的性愛派對

電影LOL︳《爸爸可否不要老》導演再拍安東尼鶴健士 新片The Son再刻劃家庭事

電影LOL︳哈利波特繼續崩壞 Daniel Radcliffe爆炸頭二撇雞造型演一代惡搞歌王

電影LOL︳《魷魚遊戲》後升呢做導演 李政宰新片HUNT韓國票房連贏3周

電影LOL︳《明日戰記》開畫累積收近600萬 破今年華語片紀錄

電影LOL︳《蝙蝠女》被下架 導演連影片檔案都拎唔返

電影LOL︳「超人」亨利卡維爾成新占士邦大熱人選 當年試鏡落選 原因竟然係…

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!