電影LOL︳荷里活巨星片酬大公開 湯告魯斯憑《壯志凌雲︰獨行俠》賺1億美金

《壯志凌雲︰獨行俠》成為今年暫時嘅票房之冠，全球收入至今接近12億美元（下同）。根據外媒Variety報導，男主角湯告魯斯向來都係吸金聖手，新版Top Gun估計可以為佢帶來一億收入！Variety因此寫咗篇報導，大爆明星片酬。

「靚佬湯」可以賺咁多，因為佢唔止收電影公司一份片酬，仲會計分紅，而且條數計晒戲院、串流以及其他電影租賃收入，不得不佩服「靚佬湯」數口精。Variety訪問一位業界人士，佢話好多明星份片酬根本唔值咁多，但係Tom Cruise做宣傳夠搏命，全世界跑勻晒。難怪呢位圈中人都話「唔會同Tom Cruise對賭」！而「靚佬湯」嘅合約條件向來夠辣，例如電影分紅要分俾佢先，連片商都冇佢咁早收到數，難得在喺超級英雄片當道年代，Tom Cruise冇拍呢類片，都有公司肯落搭，證明佢真係好有叫座力。

呢位電影界人士仲話，Tom Cruise以外，仲有一位明星份片酬係物有所值……佢就係The Rock。據報導，「巨石」先生接拍DC新片Black Adam係收2250萬美金，另加出任監製嘅酬勞，同埋用佢社交媒體出post嘅宣傳費等。

係人都知明星身價同海鮮價一樣咁浮動，人氣當然係主因。例如Jason Momoa主演嘅《水行俠》收10億之後，佢同片商再傾過續集份約，最終加薪一倍收1500萬。而憑《小丑》奪得金像影帝嘅祖昆馮力士，拍第一集時收450萬，到拍續集已經開價2000萬 － 喂，你套戲收10億，我開多你1500萬唔過份啩？

近年串流平台生意好，明星亦都可以嗌高價。里安納度狄卡比奧再拍馬田史高西斯嘅Apple新片Killers of the Flower Moon，片酬盛惠3000萬；畢彼特演賽車手嘅新片，同樣收3000萬。就連因為金像獎當晚打人而要潛水嘅Will Smith，原定接拍新片Emancipation都係收3500萬。不過呢期通漲勁升，好多人都可能勒緊褲頭減少消費，串流平台生意多少有影響，睇Netflix股價就知。而家平台未必咁手鬆，又或者喺合約加入條款保障收益，明星未必真係咁多肉可以食。

開頭提過嘅Tom Cruise，佢嚟緊2套《職業特工隊》新片都會收「平平地」千幾萬片酬，但係分紅就會更加大份。今日出海報嘅Christopher Nolan新片Oppenheimer，據報一班星級卡士如Robert Downey Jr、麥迪文、Emily Blunt等，都會效法呢種做法，由1000至2000萬起錶嘅片酬自願降價至400萬，但就喺分紅上好進取。話晒係Nolan多年來未拍過嘅劇情片，而且敲定下年暑假上，一班星自然知道票房唔弱，先至肯「減價」！

更多電影文章

電影LOL．今期睇咩戲︳神探大戰／分手的決心／超音鼠大電影2／蠟筆小新劇場版：幽靈忍者珍風傳

電影LOL︳觀眾睇完會中咒？台灣超恐怖鬼片《咒》登上NETFLIX榜首 確定拍續集

電影LOL︳吳宇森翻拍荷里活女版《喋血雙雄》 唔拍內地片因為唔想重彈舊調

電影LOL︳金像獎效應 《殺出個黃昏》、《媽媽的神奇小子》串流平台有得睇

電影LOL︳《男兒當入樽》電影THE FIRST SLAM DUNK預告曝光勁吊癮 幾大疑團仲未解開

電影LOL︳外國00後著西裝去睇《迷你兵團2》成風潮甚至被禁入場 背後原因唔止為咗呃like

電影LOL︳上半年最高票房5大港產片 全部收唔過100萬 《壯志凌雲︰獨行俠》8545萬封外語片王

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！