電影LOL︳迪士尼大地震 前CEO回巢 現任衰呢2單大嘢要敗走?

Bob Iger
Bob Iger

早排講咗好多片商華納嘅人事調動,即使唔係行內人,當係故事咁睇都夠有趣。估唔到華納對手嘅迪士尼都爆出一單高層大地震,簡稱「阿Bob換阿Bob」。

是咁的,迪士尼宣布2年前退休嘅前CEO Bob Iger回朝,而原本接替Bob Iger坐呢個位嘅另一個Bob(Bob Chapek)就會退下來。

話說2020年2月, 喺「迪記」做咗47年嘅Bob Iger終於退休,用得「終於」2個字係因為Bob Iger一直都搵唔到人接棒。而最後成為迪士尼話事人嘅Bob Chapek,無論係電影行業或者金融界,都對佢唔多熟悉,因為Bob Chapek係做開樂園同消費品事務,最多都係兼任埋迪士尼發行及家庭影院嘅總裁。對於做電影起家嘅「迪記」而言,又真係幾唔夾,於是喺行內吃得開嘅Bob Iger好多時都俾人問幾時返嚟做。

Bob Chapek
Bob Chapek

Bob Chapek或者運氣唔多好,一上任就撞正新冠疫情,要決定樂園是否運作,電影係咪要改期等。本來佢應對疫情嘅策略都做得唔錯,但後來越來越多大鑊嘢,例如佛羅里達州限制向幼兒至3年級學童講解性取向及性別認同嘅Don’t Say Gay法案,Bob Chapek處理差劣令員工同佛羅里達州州長即使唔同取態,但係都一致鬧爆迪士尼。而因為疫情關係,Bob Chapek將Marvel嘅《黑寡婦》放上Disney+優先播放,結果令女主角Scarlett Johansson 告上法庭,因為咁做會影響電影票房,亦即係佢份分紅。再加上Bob Chapek主政期間,Toy Story系列分支《光年正傳》票房麻麻,加埋加埋都足以要執定包袱。奇就奇在今年6月先至同Bob Chapek續約,咁好大機會係呢期先有人打動到「舊Bob」出山嘞。

至於Bob Iger就會有2年任期,任務之一係搵接班人,吖……之前搵咗咁多年,搵到一個做咗2年就發覺唔妥,會唔會其實係Bob Iger相人方面…有…啲…事呢?

更多電影文章

電影LOL 今期睇咩戲︳忽然心動/神速特攻隊/她說/世間有她/海的盡頭是草原/記憶。復仇

電影LOL︳Lindsay Lohan變洋版李婉華 拍聖誕愛情片搏反彈

電影LOL︳預告繼續爆肌繼續跳 《光豬舞壯士3》出年情人節同你搶女友

電影LOL︳新海誠極催淚新作《鈴芽的門鎖》日本開畫打低《黑豹2》

電影LOL︳《黑豹2︰瓦干達萬歲》全球收3.3億美元 成年度開畫亞軍

電影LOL︳姊弟戀成大熱題材 Anne Hathaway新片溝掂小鮮肉偶像

電影LOL︳殺神John Wick劇情關鍵酒店 都會拍外傳 仲有Game等出街

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!