【電影LOL】Netflix 拍《幽遊白書》真人版 會唔會又崩壞?
需要大量內容供應嘅串流平台Netflix,最近推出由日漫改編真人版劇集《今際之國的有栖》反應唔錯,今日又有消息傳出,Netflix會開拍真人版《幽遊白書》劇集!導演人選會係Netflix另一套日劇《AV帝王》嘅坂本和隆。
富樫義博創作嘅《幽遊白書》係90年代經典日本連載漫畫,同《龍珠》及《男兒當入樽》一齊被譽為當時三大作品,至今銷量超過5千萬本。故事以不良少年幽助因為拯救小孩而被車撞死展開,幽助後來成為靈界偵探,並且參與不同嘅戰鬥,穿梭人間同魔界。
《幽遊白書》出名同受歡迎,但係更為人談論嘅係漫畫嘅結局,唔少粉絲都認為喺作品人氣最強之際,突然用小故事形式作結,有「爛尾」之嫌。富樫就話與其要跟出版社意願連載落去,倒不如自己任性啲將故事完結。
《幽遊白書》真人版消息一出,立即有個疑問︰點先拍得好睇?首先故事以虛構嘅人間、靈界同魔界為背景,又有好多超自然故事,真人版點樣用畫面交代?係咪好似《今際之國的有栖》咁,用大量綠背景+後期製作處理?
另一個疑惑就係角色造型,個個都有特色同獨特氣質︰好型嘅妖狐藏馬、好細粒嘅飛影、四肢發達頭腦簡單嘅戶愚呂弟……點樣先可以整個藏馬嘅紫色頭而不失仙氣但又唔會似KPOP偶像?戶愚呂弟個飛機頭點先唔會成為笑點?咁啱上年日本有劇團演出舞台劇版《幽遊白書》,睇睇張poster你就明,出事機率有幾大。
而家仲未知《幽遊白書》真人版幾時有得睇,希望唔會好似《棋魂》真人版咁,未播已經被瘋狂恥笑啦。
更多電影文章
【回顧2020.娛樂】英電影雜誌票選年度最佳50部電影 《天能》都係排38 三甲好有文青feel
【電影LOL】因新冠肺炎病逝 三大影展得獎大導 金基德重要作品回顧
【回顧2020.娛樂】2020全球搜尋量最高十大電影 《上流寄生族》居首