神還原韓國復古大排檔!大角咀新打卡餐廳 必點招牌醬油蟹醬油蝦

大角咀突然出現韓國車站同大排檔?唔係穿越,講緊呢間月初新開、走新派復古風嘅韓國菜餐廳啫。店主用心還原韓國巴士站、地鐵站同街邊大排檔嘅環境,打卡一流,食韓國菜亦更好Feel!選擇包括大家熟悉嘅韓式炸雞、辣炒年糕、紫菜飯卷等,如果係海鮮控絕對唔好錯過招牌醬油拼盤啊。

位於大角咀嘅新沙洞大排檔,係長沙灣人氣韓式食堂新沙洞澡堂嘅姐妹店,裝修以韓國現時最流行嘅New Retro為主題。半室外座位重現韓劇常見嘅韓國巴士站,更係寵物友善空間!室內就擺咗唔少霓虹燈同地鐵車站牌打卡點。

鮮甜滿分!招牌醬油蟹+醬油蝦

新沙洞招牌醬油拼盤($288)
新沙洞招牌醬油拼盤($288)

呢份拼盤有齊爆膏醬油蟹一隻、醬油蝦四隻同紫菜拌飯,蟹膏非常滑溜鮮甜,蝦肉亦相當爽口飽滿,最後記得用醬汁撈飯擺落蟹蓋一齊食,食盡每一滴精華!大廚指呢道菜嘅重點係在於每日都要徹底翻熱醬汁,特別係醬油蟹需要浸三日先入味,將醬汁煲滾可以盡量減少細菌滋生。

暖笠笠韓式鍋物

芝士熔岩韓式辣炒年糕雞鍋($288)
芝士熔岩韓式辣炒年糕雞鍋($288)

講到韓國人氣街頭小食,又點少得辣炒年糕先?呢份芝士熔岩韓式辣炒年糕雞鍋分量十足,自家韓式辣醬更跟足韓國做法加入雪梨增加甜香,配搭煙韌嘅年糕,彈牙嘅雞髀肉,最後以大量芝士鋪面,趁熱拉芝視覺效果一流啊!老闆娘更特別提提大家,食到差唔多可以加多個麵或者做成炒飯,更加惹味。

宮廷燉牛肋骨鍋($268/2-3人份)
宮廷燉牛肋骨鍋($268/2-3人份)

怕辣嘅話就可以試試呢份宮廷燉牛肋骨鍋,大廚參考咗韓國宮廷御膳食譜,加入紅棗、冬菇、栗子、蘿蔔等食材一齊熬煮,以食材天然甜味帶出牛肋骨嘅肉香。牛肋骨係厚切,肉質軟腍入味又唔易散。大廚亦特別將菜式改良為湯鍋,特別啱鍾意飲啖湯嘅香港人!

脆炸年糕配韓式辣醬($68)
脆炸年糕配韓式辣醬($68)

小食方面推介呢個韓式辣炒年糕嘅變奏版:選用較幼身同煙韌嘅韓國年糕,炸至外香脆內煙韌後淋上韓式辣醬。口感更豐富同時保留傳統香辣味道!

抵食午市套餐

(左)韓式炸醬麵(午市套餐$68,轉太陽蛋+$6)、(右)韓式紫菜包飯卷(午市套餐$58-68,韓式罐裝飲品+$8
(左)韓式炸醬麵(午市套餐$68,轉太陽蛋+$6)、(右)韓式紫菜包飯卷(午市套餐$58-68,韓式罐裝飲品+$8

Lunch Set定價更親民!全部Set都包埋精選韓式前菜兩款同是日冰茶,亦可以加$8換成韓式罐裝飲品(粒粒桃汁/粒粒提子汁/韓國米水/梨汁)。韓式炸醬麵按港人口味調整至少甜,同時肉粒亦切得更大,更有咬口。

紫菜包飯卷就有雜菜、辣豬肉同牛肉三款口味,裡面會加入紫蘇葉增添香氣,紫菜外面當然亦會加上麻油同芝麻,難怪老闆娘會形容為麻藥紫菜飯卷:好食到會上癮啊!

韓國今期流行!原粒蜂巢蜜特飲

招牌原粒蜂巢蜜米酒($98/2人份)
招牌原粒蜂巢蜜米酒($98/2人份)

留意到韓國最近興起米酒加蜂蜜呢個配搭,蜂蜜可以令米酒更香甜更易入口,所以餐廳就推出呢款原粒蜂巢蜜米酒。蜂蜜嘅清甜同韓國米酒酸酸甜甜嘅味道好夾,加上米酒經發酵後產生嘅氣泡口感,就算係平時比較少飲酒嘅朋友應該都會覺得易入口。

(右)招牌原粒蜂巢蜜草莓牛奶($88/2人份)
(右)招牌原粒蜂巢蜜草莓牛奶($88/2人份)

小朋友無得飲酒?唔緊要,餐廳亦推出大人細路都啱飲嘅士多啤梨牛奶版本。淡粉紅嘅士多啤梨牛奶味道香甜,口感濃厚。

黑糖蜜黃豆粉麻糬刨冰($68)
黑糖蜜黃豆粉麻糬刨冰($68)

最後當然要食埋甜品啦,呢度嘅刨冰雖然唔係走韓式雪花冰風格,但刨冰灑上大量香醇嘅黃豆粉,再加上香甜嘅黑糖蜜同煙韌Q軟嘅麻糬粒粒,經典嘅配搭依然好好味。

新沙洞大排檔

地址:大角咀大政街10號地舖

文:Cathy.H

相、片:Yan Yan、Michael