顧嘉煇逝世︳大師另類經典 《夜夜痴纒》成電台禁歌 《烏卒卒》80後實識唱

香港音樂大師顧嘉煇於加拿大溫哥華逝世，享年92歲。顧嘉煇喺香港娛樂圈最輝煌時期，創造出無數經典，《獅子山下》、《上海灘》、《世間始終你好》等膾炙人口之作，大家都知係出自大師手筆。而顧嘉煇亦有一批香港人熟悉、但未必知係由佢創作嘅樂曲，兒歌到電影配樂都有﹐可見大師不拘一格嘅才華。

夜夜痴纒

顧嘉煇作曲，麥潔文主唱作品，電影《靈氣迫人》主題曲。有傳喺八九十年代，電台DJ播親呢首歌，直播室都會有邪事發生，於是成為電台「禁歌」。當年喺新城做DJ嘅蔡康年就出過事，播歌時明明直播室冇女性在場，但係佢耳邊就聽到有女聲跟住唱。有人解釋因為歌曲曲風浪漫淒美，吸引到另一空間嘅朋友。不過之後都有電台主持播《夜夜痴纒》但係無事發生。

《英雄本色》主題音樂

1986年上映嘅《英雄本色》成為「最佳百大華語片」第二位，就連唔少韓國觀眾都睇過。顧嘉煇當年為《英雄本色》譜寫原創音樂，主題曲《當年情》以外，嗰首一播就認得嘅主題音樂，同樣係大師之作。顧嘉煇憑該片獲提名香港電影金像獎及台灣金馬獎最佳原創音樂。

《歡樂今宵》晚安歌

顧嘉煇曾於TVB為綜藝節目《歡樂今宵》擔任音樂總監，當年節目完場時一定有一大班主持出嚟唱晚安歌謝幕。而呢首《晚安歌》亦係顧嘉煇少數包辦曲詞作品，歌詞只有2句︰歡樂今宵再會，各位觀眾晚安！

《無悔愛你一生》

1995年開播嘅《真情》，曾經以1128集成為TVB史上最長壽處境劇，直到近年先俾《愛．回家之開心速遞》取代。《真情》嘅主題曲《無悔愛你一生》算係顧家煇後期作品，但功力不減，依然有令人一聽入腦嘅旋律。

《烏卒卒》

翻查資料，九十年代兒歌天后陳松伶其中一首金曲《烏卒卒》都係顧家煇作品。《烏卒卒》本來係兒童節目《閃電傳真機》其中一個環節，但係後來大受歡迎，甚至有埋主題曲。只要你係80後電視精，細個都應該聽過兼識唱《烏卒卒》！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！