颱風下圓個唱夢 馮允謙向AK探聽「肌」情

馮允謙邀得AK任嘉賓,笑言像奇迹一樣。
馮允謙邀得AK任嘉賓,笑言像奇迹一樣。

唱作歌手馮允謙(Jay)在颱風襲港下圓個唱夢,帶淚送歌給天上的嫲嫲,又幫歌迷謀福利,公開要求擔任嘉賓的男團MIRROR成員Anson Kong(AK)除衫騷肌。AK爆料指2人再有新合作,但竟連Jay自己也不知,認真搞笑!

馮允謙苦等10年,前晚在九龍灣為一連4場《Have a JAY Time 2022演唱會》揭開序幕,騷前卻撞正8號風球來襲,幸好天公作美,開場前約5小時改掛3號風球,演出得以順利舉行。

孭住結他踏上J字舞台的他,感謝歌迷及台前幕後,包括在場的父母,而梁釗峰、林奕匡、蔡一傑、MIRROR隊長Lokman、林德信及同門的ANSONBEAN、雲浩影亦風雨不改捧場。提及湊大他的嫲嫲2年前因疫情過身,他含淚送上為對方而寫的《給缺席的人唱首歌》。

新合作懵盛盛

Jay整晚跳舞又騷肌,令歌迷尖叫連連,而全晚焦點是他以「大隻、跳舞好叻、請得佢嚟係Mir……acle」來形容嘉賓AK出場,Jay笑問:「我幫佢哋(指觀眾)問,你會唔會除衫?」AK反問:「依家?買(MIRROR)演唱會飛入場就知道有冇除衫。」又表示已為他準備好MIRROR演唱會門票,Jay大讚:「佢超級謙虛和友善,結他彈得好但好少表演,點解呢個人又彈得又跳得個人又咁好嘅呢?」AK「回禮」說:「似你囉!你剛才跳舞都好掂喎!」又表示很開心與偶像Jay有新合作,怎料Jay懵然問:「我知道未㗎?」AK拖住他提醒:「我哋錄咗㗎啦!」Jay這才恍然大悟,全場報以笑聲。

此外,獻唱金像獎主題曲《金人》的MIRROR,將出席頒獎禮任表演嘉賓,成員姜濤在社交網上載錄音室相,留言:「團歌搞定,開始11胎!」預告將籌備個人新歌。

唱得彈得之餘,馮允謙又大晒苦練已久的舞功。
唱得彈得之餘,馮允謙又大晒苦練已久的舞功。