「飛紙仔」速記對白 林夏薇啪合桃補腦 馬國明預咗NG

馬國明與林夏薇在律政新劇要挑戰長對白，無奈劇本未寫好，要邊拍邊「飛紙仔」，難怪出口術講明會NG！

馬國明、林夏薇、游嘉欣等昨日在將軍澳電視城為無綫新劇《法言人》拜神，飾演律師樓師爺的馬國明，雖然並非演律師，但辦公室戲亦對白多多，他說：「有時一個案件成10頁對白，好多法律名詞要背，同埋未出晒劇本，要『飛紙仔』，都考少少急才，收到紙仔就要即刻背，所以有啲NG都好正常，哈哈！」

林夏薇小時候志願做律師，今次終有機會圓夢，她說：「入行以嚟終於第一次做律師，好緊張，好多對白要講，拍之前睇咗啲律師戲準備，仲買定合桃補補個腦！」她與馬國明繼《寒山潛龍》後再合作，更首度演情侶，她早前在《七公主》大膽露背，今次可有激情戲？她笑說：「唔好喇！都期待之後有咩場口，因為劇本仲未出晒。（如果寫到好激呢？）又嚟？應該唔會，今次角色係『滅絕師太』，尖酸刻薄啲嘅。」

游嘉欣喊唔停

至於游嘉欣劇中與孔德賢演情侶，笑言終於撇甩林正峰，她說：「個角色幾有壓力，有好多情緒演出，講唔夠兩句又喊。（話喊就喊？）可能要食辣椒、Wasabi先得，真係要試多幾次，要代入角色，將Tough嗰一面收埋。（袋定眼藥水？）袋定Wasabi仲好啦！如果真係喊唔出，呢個可以係後備方案。」