養家壓力大 節衣縮食 譚俊彥恨做視帝 幫補生計

肩負家庭重擔的譚俊彥,期望有獎攞,有名便有利。
肩負家庭重擔的譚俊彥,期望有獎攞,有名便有利。

入行逾20年的譚俊彥坦言恨攞視帝,但原因並非為名,身為好爸爸的他直言養家壓力大,每月掹掹緊,如果攞視帝可以為仔女帶來更好生活的話,他就絕對想攞!

藝人譚俊彥(Shaun)擔正的台慶劇《換命真相》正熱播,加上近日因與韓劇《魷魚遊戲》的主角李政宰撞樣而hit爆,令他爭視帝一獎佔盡優勢,對此他坦言:「視帝真係要天時地利人和,如果到時真係好有機會,我會全力爭取,今年入場券攞咗,運氣、時機攞咗,我會盡力爭取,結果係點冇人知。」問到從演逾20年的他可恨攞視帝?他坦言如果攞完獎可以有更穩定的工作和收入,就絕對想攞,直言因為養家壓力大:「我依家做嘢目標係想搞掂仔女嘅所有學費,我想畀最好嘅佢哋,嗰筆錢都唔少,好吃力,就算我唔使,我哋一家人都要使。」

買電單車計過度過

他坦言一家人每月使費頗大,燈油火蠟柴米油鹽、住屋、小朋友學費等,直言每個月都掹掹緊,有時甚至要用儲蓄補貼,故自己惟有節衣縮食,就算想買輛心愛的電單車,都要儲錢一、兩年,不過不擔心賺錢問題,因自己除了幕前還有飲食生意。

Shaun拍劇向來勞心勞力,今次為了角色「時光」而刻苦減肥,希望大家看到不一樣的他,而碰巧當時要接住拍《拳王》,為了操練不但半年冇飽飯食,更捱壞身子致爛面:「我從來好少生瘡,但嗰時賀爾蒙失調,搞到成塊面爛晒,爛咗一星期,之後先可以化妝,嗰時對住塊鏡想自殺,哈哈,而且最爛竟然仲要拍廣告。」

爛面傷腳禍不單行

劇中有不少動作戲,他爛面後又傷腳,禍不單行:「嗰時跑步落斜整傷膝蓋,半月板腫晒,就算拍啲簡單跑嘅鏡頭都好痛,痛咗3、4個月。有個星期好辛苦,因為吊橋嗰幕親身上陣,而且最辛苦係有幕抱住蔣家旻跑3層樓梯,跑足3、4次,都有場係抱鄧佩儀行沙灘,其實佢哋都瘦,但始終係個人,惟有當係負重訓練。」