《香港金曲》預告唔到都有獎 JW打破壟斷 劇集歌拔頭籌

歌手JW及譚嘉儀被指取代兩位「劇集歌后」吳若希及菊梓喬，先拔頭籌分別獲頒發「最佳劇集歌曲獎」的金、銀獎外，更揚言想爭取拍劇機會，全力雙線發展。今次頒獎禮打破以往慣例，大會表示「人唔到都有獎」。

由無綫及港台合辦的第一屆《香港金曲頒獎典禮》將於本周日舉行，昨日頒發「最佳劇集歌曲獎」金、銀、銅獎，以往在《勁歌金曲頒獎禮》的「劇集歌曲獎」必由吳若希（Jinny）或菊梓喬（Hana）橫掃，但今次頒獎禮由JW的《我不想別離》奪金獎、譚嘉儀的《不可能發生》獲銀獎，Gin Lee與蕭凱恩合唱的《這種親》則奪銅獎，已率先有半個獎落袋的Gin Lee，以「有工作在身」為由將會缺席。

問到JW和譚嘉儀取代兩位師姐成新一代「劇集歌后」？JW說：「冇話代唔代替，一路都好多新歌手，好似『聲夢』嗰班學員都出嚟唱新劇歌。」談到有份參演的新劇《痞子殿下》快將播出，JW說：「最好係參演劇集之餘，再唱埋劇集歌。（咁要加簽合約喎？）點解？唔係嘅！」她指因《痞》劇與陳瀅、周嘉洛及朱敏瀚成為好友，問到陳瀅與周嘉洛的緋聞，她代澄清：「佢哋唔係一對。（你點知佢哋冇嘢？）我哋只係關係太好，畀人產生其他聯想。」

譚嘉儀年年送禮博拍劇

至於已有3年多沒拍劇的譚嘉儀順勢自薦，笑問是否要主動向監製敲門送月餅？她即笑說：「呢啲年年都要啦！最想演有關揸電單車、貨車同水上活動嘅劇。」

同場的TVB Music Group行政總裁張仲恒表示：「因為係投票選出，所以就算歌手冇到，都會照有獎，以示公平。」他又謂已邀請MIRROR出席，但他們要忙翌日的紅館演唱會，已回覆未能到場。