馬國明最怕玩新郎環節 黃嘉樂讀愛的宣言爆喊 老婆預告生6個

無綫藝人黃嘉樂昨日與拍拖5年的女友Samantha結婚，馬國明與唐詩詠等任兄弟團。嘉樂表示讀愛的宣言時與老婆齊齊落淚，至於造人大計，新娘子賣口乖話聽晒奶奶話！而馬國明笑言將來結婚，會取消玩新郎環節！

現年43歲的黃嘉樂與攝影師女友Samantha（江惠賢）昨日結婚，於九龍某5星級酒店擺酒，筵開21席。兄弟團陣容鼎盛，包括「鐵馬家族」成員馬國明、唐詩詠、林子善，以及好友許家傑、楊潮凱、李天翔及陳偉洪等，至於「鐵馬家族」另一成員鄭嘉穎因工作未能出席婚宴。

昨晨眾人浩浩蕩蕩到酒店接新娘，期間嘉樂向Samantha單膝下跪盡顯誠意。穿上中式裙褂的新娘子手戴兩卡婚戒，胸前掛有六個金豬牌外，還有五對龍鳳鈪（胸前一對，左右手各四隻），被網友笑指跟梁朝偉在《尚氣與十環幫傳奇》飾演的「文武」同樣擁有十環，相當搞笑。

兄弟團計謀得逞

傍晚5時許，一對新人穿上西式禮服受訪，並在兄弟團起哄下連環咀嘴。嘉樂表示結婚前一晚緊張到失眠，接新娘一刻才如釋重負：「好肉痛老婆，婚禮籌備大部分都係佢搞，因為我要開劇。」談到玩新郎環節，嘉樂笑言：「佢太錫我，畀晒兄弟玩，我冇畀人糟質。（接新娘有冇感動位？）講愛的宣言嗰一刻，兩公婆一齊喊。」他坦言要拍攝新劇，故未能度蜜月，但劇組很好，讓他放3日假。問到造人大計？新娘子豪氣說：「要睇奶奶想要幾多個。（你今朝佗住六個金豬牌，寓意生六個？）奶奶OK咪得囉。」

而林子善表示接新娘過程相當順利，全因他們計謀得逞：「今朝玩新郎好多嘢都Skip咗，我哋夾咗遲啲上去，上到去佢哋仲急過我哋，策略成功。」屢傳好事近的馬國明被問有否乘機取經？他笑言：「完全冇，將來我結婚嘅話，玩新郎部分全部Cut晒佢，因為我有遊戲恐懼症。」提到他沒有Gel頭，連唐詩詠都差點認不到他，他即解釋：「我今朝3點幾開始Gel頭，但點整都冇用，今日最靚仔一定係嘉樂。」

湯洛雯：張卡仲未出

湯洛雯於晚上出席婚宴，馬國明專誠陪女友再受訪。談到男友揚言準備出附屬卡給她，馬國明緊張搶答：「呢個係我嘅主意，情趣嚟㗎，你哋都唔了解女仔心態。我出咗張卡畀佢，佢未必用㗎，係意義上嘅嘢嚟。」不過湯洛雯即踢爆：「重點係張卡仲未出。」

至於前日於西貢拍劇時中暑的林夏薇，昨晚畀面出席婚宴。她表示跟嘉樂拍攝劇集《法言人》時認識，一早約定會出席對方婚宴。