馮皓揚讀TVB藝員訓練班一日就退學 網民支持決定:根本就唔應該上
馮皓揚(羊羊)喺電影《媽媽的神奇小子》「少年版蘇樺偉」一角,於《第四十屆香港電影金像獎》擊敗古天樂等勁敵勇奪「最佳男配角」。佢喺奪獎前報讀今年嘅TVB藝員訓練班,並喺頒獎禮翌日現身電視城,當時佢表示自己喺講嘢方面比較弱,希望糾正懶音,變得字正腔圓。消息出街後,網民對佢嘅舉動感到驚訝,不過日前佢出席活動就透露自己上咗一日課就已經退咗學。
今年嘅TVB藝員訓練班由金像導演陳德森擔任校長,而導師方面就有羅冠蘭、鄭丹瑞、曾志偉、錢嘉樂、譚俊彥、袁偉豪等藝人。當網民們知道馮皓揚報讀TVB藝員訓練班後,紛紛留言表示驚訝,除咗對導師實力有保留之外, 亦指佢自貶身價。不過日前羊羊喺出席活動就透露自己喺參與香港電影金像獎後,只係瞓咗一個鐘頭就去咗上藝訓班課程。佢仲話後來同公司商量後就冇再上堂,日後佢亦會以學習心態去參與每一次嘅演出。另外,亦有指佢認為課程未必太適合拓展佢嘅演藝事業,而教學模式亦同佢嘅預期有落差,所以選擇退學。唔少網民對佢退學嘅決定表示支持,留言話「學生做戲仲好過導師」、「原來第一日搵咗譚俊彥去分享,唔怪得即quit」、「可能以為真係有嘢學,點知一睇完全唔係嗰回事」、「叻仔」、「根本就唔應該上」、「見到個導師梗係退學啦」、「做得好!抵讚」、「唔對路就撇,欣賞。」及「做得非常好 以後會睇你嘅戲」等等。而馮皓揚喺退學後已經有新工作,佢日前與李施嬅、關智斌、栢天男及楊天宇等人出席電影《錄影歹》(暫名)開鏡拜神儀式,佢喺電影中將會飾演關智斌嘅年青版。
另外,身為今期TVB藝員訓練班導師之一嘅袁偉豪,噚日喺社交網站轉載相關報道嘅圖片,並疑似不滿留言話:「我欠左你地班傳媒?」雖然有網民支持袁偉豪,不過亦有網民留言話佢小器,例如「其實會唔會係你小器左?」、「笑死,話你地無緣交流啫,嬲乜」、「冇傳媒,你邊有飯開?邊個識你。sor,唔記得你有老婆煮既飯。」、「張生崩口人忌崩口碗」、「小器到咁 抵你比人抽」及「你自以為自己好紅啫」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!
是日精選