馮盈盈音波功失靈 丁子朗大覺瞓

丁子朗與馮盈盈於新劇有感情線，向來說話多多的盈盈一反常態玩文靜。至於子朗爭取時間補眠，竟然沒被身旁的盈盈「音波功」嘈醒！

無綫藝人丁子朗、馮盈盈、黃庭鋒、馬貫東與彭慧中等，日前於將軍澳一間幼稚園拍攝無綫新劇《妳不是她》，由於現場有太多小朋友演員，故拍攝需時。未正式埋位時，子朗坐在盈盈隔籬「釣魚」瞌眼瞓。

黃庭鋒做「溝女擔當」

他受訪時笑言因為太早拍外景，故有點眼瞓。談到他坐於「音波功」強勁的盈盈身旁都沒被嘈醒，子朗笑言：「我又完全Feel唔到啲音波，佢好正經，拍起上嚟大家有火花，我覺得盈盈好正，大家都有一段時間冇見。我同佢同年參選香港小姐、香港先生，之後都冇合作過，直到依家。今次我個角色係大細路，所以幾好玩同輕鬆。」而盈盈自稱向來拍劇時比較靜，不多講說話：「因為呢套劇有好多內心戲，成日要醞釀情緒，平時我會靜靜哋喺一邊聽音樂、睇劇本嚟投入角色，自己沉思，因為唔想分神影響表現。」

至於劇中喜歡盈盈、但又會四圍識女仔的黃庭鋒，被大家指是「溝女擔當」，他說：「初初睇劇本都嘩咗一聲，我未做過呢啲角色，比較花弗，佢內心冇乜安全感，比較孤獨，會去識唔同女仔，去到學校見到Miss關楓馨又會有興趣。」他強調現實中是工作狂，不用開工會宅在家中，角色跟真實的自己有很大反差。