驚青跳樓冇安全感 MC處男吊威吔焗親「小天賦」

「樂壇新人王」MC張天賦初次拍戲，已有機會一嘗吊威吔滋味，從3樓一躍而下！他坦言神秘三角位置辛苦到透不到氣，但又覺得刺激好玩，更自嘲經常在片場搗亂，幸好有Fans送贈的涼茶為工作人員下火。

MC張天賦、凌文龍、李靜儀、郭奕芯聯同一眾新人，包括姜濤緋聞女友黃曦誼、陳紫萱、陳伊霖及方泳琳等，日前為劉翁導演、黃永峰監製的電影《夜校》開工，劇情講述眾人在天台對付反派「肥腸」徐浩昌，期間MC從3樓躍下，場面觸目驚心！

自爆片場搗亂

人生首次吊威吔的MC坦言一吊難忘：「雖然做足安全措施，但我好冇安全感，感覺好似要跌，但又被拉住咁。神秘三角區域就箍得好辛苦，透唔到氣咁，但其實幾好玩。」開工近一星期，他的最大感受是缺乏睡眠，解鎖隨時隨地入睡的技能。談及表現，他說：「我畀自己評價幾好，因為套戲幾瘋狂，容許我蝦碌同爆肚。」又慶幸Fans送來涼茶及甜品，他笑說：「我個人比較難搞，好鍾意喺片場搗亂，周圍搞啲道具，啲涼茶正好畀工作人員下火。」

至於凌文龍有場歌舞戲，由於天氣熱加上戲服厚，拍到手套滴水兼底褲濕透。女子組方面個個都要喪跑，李靜儀開玩笑稱懷疑導演想訓練她們成為短跑高手，希望獲贊助按腳療程；跟MC有感情線的黃曦誼有場戲要打對方，練習時卻誤打化妝師。