鯊魚喺街市都有得賣 懷疑係 Baby Shark 網民指誤會但不建議食用

街市真係唔少人嘅「寶藏」，各式各樣的食材都可以在街市買到，但又未必每一種都啱一般人口味。有網民就在 facebook 群組問及，在街市見到有魚檔販賣「鯊魚 BB」，問其他網民要怎樣烹調食用。有網民就覺得殘忍，連「鯊魚 BB」都食，應該放過它們；但是亦有網民澄清，圖中的鯊魚以體型計已屬發育完成，但仍然不建議食用。

網民 Ming So 昨日在群組「香港街市魚類海鮮研究社」發帖，表示在深水埗北河街街市見到有「鯊魚 BB」賣，50 元一盤，到底要「點樣食」；根據目測，一盤都最少有 5、6 條。有網民見到帖文就表示「真係折墮」；「BB 點食得落口啊」；「魚 BB 係唔應該食嘅，咁食法，個海遲早冇晒魚」。

及後，就有網民在帖文內澄清，「佢哋唔係 bb，本身品種係呢個 size」，之後亦有網民指，這種鯊魚學名是「尖頭斜齒鯊」。

根據資料，尖頭斜齒鯊在南海都是常見物種之一，多會成群游弋；牠們主要吃其他魚類、蝦類及烏賊為主。尖頭斜齒鯊雄性成熟時長 24 - 26 厘米，雌性成熟時長 33 - 35 厘米，屬於暖水性較小型鯊魚。

雖然街市有得賣鯊魚，但帖文中不少網民都不建議食用。有網民就解釋，鯊魚本身並沒排尿器官，日常排尿全靠皮膚完成，因此鯊魚都是相當臭，「死後擺耐咗仲有阿摩尼亞味」；「以前有親戚係漁民，如果唔係窮到冇嘢食都唔會食鯊魚」。另有網民就指，「幾平都唔好買，等魚檔知道無價值」。

雖然鯊魚帶有臭味，而且有網民已經表示這種鯊魚肉身老、又硬又不好吃，但如果真係要買嚟食，又有甚麼方法？有網民就指在東南亞，有人會將鯊魚起肉，製成咸魚或者用來製作魚蛋。不過，街市有咁多靚魚，相信對很多人而言，有排都未揀到要食鯊魚了。