龔嘉欣怕整壞火箭零件 郭晉安鬥喊功似鍊車 笑陳煒慳住標淚

視帝郭晉安與陳煒合作，齊齊大展喊功，互笠高帽讚對方演技。安仔自認平日易喊，又以「環保電動車」來形容拍檔陳煒的出色表現。

郭晉安、陳煒、龔嘉欣、陳山聰、劉穎鏇、何廣沛及江嘉敏等，昨日出席無綫回歸系列電視劇記者會，據悉今次5個單元加15集電視劇，動用了超過90位演員協助拍攝。身為靈魂人物的安仔及陳煒受訪時坦言劇內鬥晒喊功，安仔憶述：「最難忘係交代我要賣咗間小菜館先可以救到夥計，我唔捨得自己嘅心血，摸黑喺度抹枱，陳煒入嚟安慰我，我講完一句對白即刻爆喊！」

他大爆陳煒同樣「喊得」：「有日佢趕住出外景，但導演同佢講拍埋少少先，話企喺度喊就得，佢就即時喊得出，然後好似冇事咁出外景！」安仔打趣指陳煒的喊功恍如環保電動車——「唔會嘥力」，而陳煒則形容安仔是「高性能跑車」：「喊功好有爆炸力！」問到現實中是否眼淺之人？安仔自認平時睇戲或會被一句對白觸動，陳煒則自覺比較理性：「但唔知點解見到升旗禮或運動員得獎，我就忍唔住喊。」

陳山聰入黃竹坑受訓

另外，龔嘉欣擔演的單元《究竟天有幾高》劇情關於航天科技，籌拍時她得悉港人有份參與火箭製造：「我哋去咗理工大學嘅實驗室取景，當中有火箭零件放喺度，工作人員叫我哋小心啲，因為係畀國家航天局帶上太空嘅！」提到剛播畢的劇集《18年後的終極告白2.0》最後一集爆喊戲獲激讚，她表示：「當日分咗3個場景拍，足足拍咗6、7個鐘，我整個人陷入崩潰狀態。多謝譚俊彥幫我入戲，摑完佢我隻手都腫晒，我從來未摑過異性，手感好正。」

而陳山聰與劉穎鏇繼《大步走》後，今次再於單元《我的驕傲》扮演父女，記者指2人有緣，山聰即笑說：「做我個仔契媽囉，到時準備張禮物清單先！」劇中扮演升旗手的他說：「開拍前花咗5日喺黃竹坑受訓，好彩操咗幾日都被讚有板有眼。」又表示最難忘是記好拍子，而且是首次踏上金紫荊旗台。劉穎鏇則要講普通話對白，她說：「呢方面我完全唔得，喺屋企不停咁練習。」