《一笑渡凡間》下週大結局 由黑色幽默短劇《欺詐劇團》緊接出街

·2 分鐘文章
《欺詐劇團》&《刑偵日記》
《欺詐劇團》&《刑偵日記》

無綫8點半及9點半黃金檔期正在播放《逆天奇案》及《一笑渡凡間》,而口碑不俗嘅《逆天奇案》將會喺今晚播出大結局,緊接《逆天奇案》出街嘅就係由馬國明、岑麗香、商天娥、龔慈恩、吳岱融、李國麟、張頴康及陳自瑤等人主演嘅《寶寶大過天》,宣傳短片亦已經陸續播出。另外,《一笑渡凡間》亦將於下星期播出大結局,劇評人方以文喺社交網站就講咗由邊套劇接棒播出。

《寶寶大過天》劇照
《寶寶大過天》劇照

古裝劇《一笑渡凡間》喺下星期播完之後,緊接喺6月21日9點半播映嘅就係只有7集嘅黑色幽默短劇《欺詐劇團》,劇集搵嚟首度做男一嘅敖嘉年、鄭丹瑞、蔣家旻、張秀文、張達倫及JW等人主演,劇情主要講述監製Herman(鄭丹瑞飾)、導演陳志揚(敖嘉年飾)、編劇李莎莎(蔣家旻飾)、武術指導文師傅(林偉飾)、美術指導Shell(林秀怡飾)、女星樓家齡(張秀文飾)以及副導蔡子樂(劉頌鵬飾)被封殺,佢哋為咗實現電影夢而走上做老千嘅道路。

緊接《欺詐劇團》於6月28日播出嘅就係以人格解離症為題材嘅《刑偵日記》,由王浩信、惠英红、姜皓文、袁偉豪、黄智雯、黎諾懿、王敏奕及陳煒等人主演,劇情圍繞唔同嘅心理及精神病患者,例如惠英紅飾演精神病康復者、王浩信飾演多重人格患者、姜皓文就飾演患有有燥鬱症嘅警察等等。劇集雲集咁多好戲之人大鬥演技,相信唔少觀眾都會好期待。

《欺詐劇團》劇照
《欺詐劇團》劇照
《刑偵日記》海報
《刑偵日記》海報

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能