《一笑渡凡間》下週大結局 由黑色幽默短劇《欺詐劇團》緊接出街

無綫8點半及9點半黃金檔期正在播放《逆天奇案》及《一笑渡凡間》，而口碑不俗嘅《逆天奇案》將會喺今晚播出大結局，緊接《逆天奇案》出街嘅就係由馬國明、岑麗香、商天娥、龔慈恩、吳岱融、李國麟、張頴康及陳自瑤等人主演嘅《寶寶大過天》，宣傳短片亦已經陸續播出。另外，《一笑渡凡間》亦將於下星期播出大結局，劇評人方以文喺社交網站就講咗由邊套劇接棒播出。

古裝劇《一笑渡凡間》喺下星期播完之後，緊接喺6月21日9點半播映嘅就係只有7集嘅黑色幽默短劇《欺詐劇團》，劇集搵嚟首度做男一嘅敖嘉年、鄭丹瑞、蔣家旻、張秀文、張達倫及JW等人主演，劇情主要講述監製Herman（鄭丹瑞飾）、導演陳志揚（敖嘉年飾）、編劇李莎莎（蔣家旻飾）、武術指導文師傅（林偉飾）、美術指導Shell（林秀怡飾）、女星樓家齡（張秀文飾）以及副導蔡子樂（劉頌鵬飾）被封殺，佢哋為咗實現電影夢而走上做老千嘅道路。

緊接《欺詐劇團》於6月28日播出嘅就係以人格解離症為題材嘅《刑偵日記》，由王浩信、惠英红、姜皓文、袁偉豪、黄智雯、黎諾懿、王敏奕及陳煒等人主演，劇情圍繞唔同嘅心理及精神病患者，例如惠英紅飾演精神病康復者、王浩信飾演多重人格患者、姜皓文就飾演患有有燥鬱症嘅警察等等。劇集雲集咁多好戲之人大鬥演技，相信唔少觀眾都會好期待。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！