《一笑渡凡間》首播輕鬆有笑位 網民:好過成日睇警察戲

《一笑渡凡間》劇照
《一笑渡凡間》劇照

被網民恥笑「睇唔出辦咩大事?」嘅《伙記辦大事》終於播完,噚晚就有由蕭正楠同湯洛雯主演嘅古裝喜劇《一笑渡凡間》接棒。劇集以神仙故事作為題材,講述李修緣(蕭正楠飾)係濟公落入凡間嘅分身,不過誤打誤撞失咗憶成為凡人,更以武野光之名喺繡莊與染坊工作。佢除咗同女捕快蘇柔(湯洛雯飾)成為歡喜冤家之外,仲解開身世之謎與昔日好友方志朋(沈震軒飾)相認。想知網民睇完第一集有咩感受嘅話,快啲轆落去睇下啦!

劇情輕鬆搞笑
《一笑渡凡間》除咗有偵探、奇幻及愛情元素之外,仲加入咗唔少輕鬆搞笑元素。噚晚首播就已經有笑位,例如繡莊大客萬老爺(鄧英敏飾)為孫仔改名叫充滿霸氣嘅「萬震天」,不過武野光就話呢個名太勁,孫仔命格受唔起,所以就建議改叫「萬狗仔」。之後佢哋不停叫呢兩個名,而個天就不停大太陽同行雷落雨。唔少網民睇完都留言話:「幾簡單又輕鬆喎 都幾好睇吖」、「又太陽又落雨 不停係咁轉 天神表示 玩夠未呀兩條友 好搞笑」、「好耐冇睇輕鬆古裝劇…正!」及「鐘意睇喜劇,輕輕鬆鬆」等等。另外,亦有唔少網民覺得劇集有啲似《秀才遇著兵》。

終於唔係警察劇
今年無綫已經播咗幾套以警察為題材嘅劇集,例如《陀槍師姐IV》及《逆天奇案》等等,唔少網民都話睇到悶,紛紛留言話:「幾好睇呀!好過成日律師警察醫生。」、「呢套唔錯,好過成日睇警察戲」及「幾好睇喎,有笑點,一集就講到好多嘢。 第一集嚟講 好睇過伙計百倍。」等等。

《一笑渡凡間》劇照
《一笑渡凡間》劇照

蕭正楠好有喜感
蕭正楠過往都有參與唔少喜劇拍攝,例如《愛美麗狂想曲》、《公公出宮》及《超時空男臣》等等。今次佢喺《一笑渡凡間》飾演濟公,繼續發揮搞笑本色,唔少網民睇完第一集都大讚佢有喜感,例如「越來越喜歡蕭生,有佢既戲都幾好睇好笑」、「原來蕭生幾適合拍喜劇」及「蕭正楠越嚟越有喜感」等等,唔會覺得佢演得太過「夾硬」。

湯洛雯/簡淑兒靚女
劇集靚女雲集,而最受網民喜愛嘅就係飾演蘇柔嘅湯洛雯及菁兒嘅簡淑兒,仲大讚佢哋靚女又可愛,例如「簡兒個古裝造型又幾可愛」、「我覺得湯洛雯演技,樣同氣質正過陳瀅...」、「簡淑兒靚女.」、「靚湯好靚!」及「靚湯做女捕快,我鍾意。」等等。

《一笑渡凡間》劇照
《一笑渡凡間》劇照
《一笑渡凡間》劇照
《一笑渡凡間》劇照
《一笑渡凡間》劇照
《一笑渡凡間》劇照
《一笑渡凡間》劇照
《一笑渡凡間》劇照

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!