《七公主》被網民嫌老土兼悶爆 黃翠如繼續被批演技差

香港「劍神」張家朗出戰東京奧運，為香港贏得歷年第二面奧運金牌，掀起學劍擊的熱潮。為咗延續奧運熱熾氣氛，無綫特意將有劍擊劇情嘅《七公主》提前至前日（9日）8點半出街，而原本8月9日播出嘅《我家無難事》就延後至9月13日播出。《七公主》搵嚟多位女神級演員演出，包括黄翠如、林夏薇、高海寧、劉佩玥、江嘉敏、陳曉華、陳瀅及鄺潔楹，陣容相當鼎盛。劇集主要圍繞親情，講述七位同父異母姊妹喺隱形富豪爸爸離世後，尋回自身價值的故事。想知網民們睇完兩集有咩感受，快啲轆落去睇下啦！

劇情老土又悶
頭兩集劇情主要講述性格強悍嘅律師顧靈珊（黃翠如飾），為咗可以打贏官司不擇手段，誣衊車禍死者有第三者，因而令到死者太太顧語嫣（林夏薇飾）非常痛恨佢。點知佢哋喺爸爸（劉丹飾）嘅靈堂上相遇，仲被爸爸代表律師告知佢哋係同父異母嘅姊妹。唔少網民睇完兩集都認為劇情太悶及老土，紛紛留言話：「以為有套好劇睇⋯⋯點知套劇悶到死⋯⋯」、「垃圾劇集,不知所謂」、「編劇導演可否拍得寫實d, 劇情太浮誇了，睇唔落去，棄劇！」、「老套劇情」及「套戲有啲悶」等等。

黃翠如被批演技差
多年嚟黃翠如嘅演技一直被受批評，網民更加係一面倒話佢演技差，而網民對佢喺《七公主》嘅演技都依然係負評。黃翠如今次飾演又狠又辣嘅律師顧靈珊，外形cool爆，俾人一種冷冰冰嘅感覺。不過網民就認為佢駕馭唔到呢個角色，尤其係打官司嘅情節，話佢淨係識瞪大對眼同用氣聲講對白，紛紛留言話佢戲屎，例如「黃翠如啲戲完全唔掂，浮誇到不得了」、「頂唔順黃翠如把聲，好造作，over曬」、「不知所謂 吊高把聲木口木面串串貢就係演技」、「黃翠如繼續零演技，以為擘大對眼零表情講對白就係高冷律師，律師既專業同睿智一點都無」、「黃翠如太刻意了，feel唔到佢想表現嘅霸氣，只係黑口黑面」、「黃小姐carry唔到呢d角色 扮cool，懶音多，髮型出事」、「黃翠如演得太用力扮cool，面癱咁。」、「黃翠如似AI丫,無表情,無反應,眼定定」、「黃翠如啲氣聲好X難頂」及「其實脆魚不如算啦 做戲真係好唔掂 同一表情加chok聲就當做戲 咁耐都無進步過」等等。另外，網民仲認為姚嘉妮、林淑敏、蔣祖曼及陳敏之等人比佢更適合做呢個角色。

林夏薇有樣有演技
一向演技有保證嘅林夏薇，今次繼續冇令大家失望，播出兩集就已經成功搶鏡，除咗法庭戲有睇頭之外，連向黃翠如潑糞一幕亦令人震撼。唔少網民都留言大讚佢有樣有演技，包括「林夏薇超正！搶晒戲！」、「林夏微法庭戲演得好到位..交足戲..短短幾分鐘演技已k.o翠如..佢角色幾期待 翠如法庭戲只一味死背對白..高下立見」、「呢套偏向中意睇林夏薇個part多啲，感覺佢之後劇情會發揮大好多。呢兩集佢都演得好到位。講返呢套，我覺得佢靚女好多，比起逆天奇案」及「林夏薇啲演技好好多」等等。

根叔生極都係女
劉丹喺劇中飾演隱形富豪顧百方，不過第一集尾段因肺癌離世，代表律師司徒北（林韋辰飾）就告知黃翠如同林夏薇係同父異母嘅姊妹，而顧百方其實係有7個女兒，希望女兒可以合作完成佢嘅遺願。除咗《七公主》之外，劉丹喺《愛·回家之開心速遞》飾演嘅根叔亦有三位女兒（熊尚善（滕麗名飾）、熊若水（呂慧儀飾）及熊心如（蘇韻姿飾）），所以佢喺呢兩套劇集加埋已經有十個女兒，難怪有網民留言「根叔怎麼都生女兒？」、「根叔死咗？估不到你那麼風流」、「根叔十個女」及「唔知點解見到根叔張車頭相個樣硬係覺得佢係嚟搞笑」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！