《伙記辦大事》大結局繼續被負評 網民：睇唔出辦咩大事

無綫劇集《伙記辦大事》搵嚟重量級演員歐陽震華、馬德鐘、萬綺雯和陳瀅坐陣，去到噚晚終於播出大結局，首20集平均收視24.55點；如果同8:30播出嘅《逆天奇案》比較首周收視，少咗足足3點。今次劇集嘅口碑和收視連「收視福將」都挽救唔到，越跌越低。

收視唔理想都唔可以怪晒一班演員，劇本都要負上好大責任，首先劇集開頭不停講國際犯罪集團主腦「聶先生」有幾聰明，但佢最後竟然係接貨時被萬綺雯一槍射死，而另一反派鄭子誠竟然死於心臟病，兩個都死得太簡單啦。

唔少網民亦認為劇名都出現問題，叫得《伙記辦大事》固然要有「辦大事」場面啦，交通警跨部門破獲珠寶走私案，同埋歐陽震華私自調查老婆死因，大部份劇情都係情情搭搭，完全唔知辦咗咩大事。

另外，劇中又有好多唔合理情節，例如交通警賴慰玲架私家車竟然無安裝車CAM、「聶先生」嘅衝鋒槍又射唔穿警察嘅私家車車窗，好多劇情都好牽強。最後常笑（陳瀅飾）仲同戴政君（馬德鐘飾）坦白自己係臥底，真係老土到令人尷尬。

雖然網民們有唔少意見，不過都係給予《伙記辦大事》劣評居多，例如：「有資源有演員都拍到咁既劇出黎 真係晒錢晒時間」、「大結局做兩個鐘，頭一個鐘既感情交代，浪費和hea時間，一個鐘頭時間可以做哂！」、「其實成套野係做咩」、「真係睇唔出辦咩大事...」、「TBB真係要檢討下, 點解可以拍到一套咁既劇出來」、「成個結局悶到發瘟，編劇好有問題」、「本身係因為bobby 先開始睇，點知白睇左31集...」及「睇完忍唔住問自己咁耐睇左乜」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！