《全民造星IV》徵女團名 網民發揮創意爆笑改名：叫「女子十二方方」

ViuTV選秀真人騷《全民造星IV》打正旗號選女團，節目現正進行得如火如荼，最近已經第四回合淘汰賽，30強參賽者爭入25強，距離選出女團成員越嚟越近。喺今日，ViuTV喺Facebook專頁出PO徵女團名，結果吸引唔少網民提供意見。

ViuTV喺Facebook專頁以「《全民造星IV》徵女團名！聖誕節送你入去睇總決賽！」為題出PO徵女團名，仲話最有創意嘅100位觀眾，就可以獲得《全民造星IV總決賽》入場名額兩個，喺聖誕節當日現場見証女團重要嘅一刻。此PO一出，唔少網民都留言提供女團名，當中唔少仲創意滿分，例如「風車草分部」、「如果係10人女團，方方做隊長 就叫 十方者」、「涓方夜談」、「祖傳秘方」、「男團有mirror, error, 下一隊就叫horror啦」、「方涓女子十二舞團」、「女子十二方方」、「wing姐兒童合唱團」、「祖堯女孩 jojo’s picks」、「Era! 有mirror有error, 讓女團再創一個era」、「男團Mirror 咁女團叫Warrior / Warrior Girl ？」及「Flower forever」等等。唔知大家又覺得呢隊女團叫咩名好呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！