《反起跑線聯盟》題材貼地惹共鳴 網民：有小朋友嘅就會知

由梁詠琪、周家怡、潘燦良及強尼等人主演嘅ViuTV劇集《反起跑線聯盟》現正熱播中，劇集以學童成長為題材，劇情貼地、現實又感動，成功引起一班爸爸媽媽嘅共鳴，仲紛紛留言大讚好睇。

上星期五劇情就講到Martin喺智力測試嘅成績唔太理想；Billy仲未戒夜片，及羅仔同表姐比拼數學出洋相，所以家長們嘗試唔同偏方，希望可以令佢哋改善，不過就為囝囝增添無形壓力。之後，Charles（潘燦良飾）更希望幫Martin轉校，不過呢個舉動就令Martin相當不滿，搞到要搵Venus（周家怡飾）幫手。原本Venus以為Charles會諗通，點知佢竟然向幼稚園施壓，希望小朋友可以贏在起跑線。學校逐漸分成兩股勢力，Nora（梁詠琪飾）與同理念家長決定成立「反起跑線聯盟」，捍衛小朋友嘅愉快學習環境。

《反起跑線聯盟》播出幾集後，唔少網民都紛紛留言大讚劇集好睇、感動及有共鳴，例如「好睇，我晚晚同小朋友一齊睇，有好多感動位」、「好睇，小朋友好得意 完全講中媽咪既心聲」、「有睇，今日講死亡果度真係眼濕濕 最中都係第一集既強尼」、「真係好好睇 集集都有反思同學習位」、「集集都有感動位」、「啱啱睇到死亡果段諗起自己親人即眼濕濕」、「好好睇呢套真係，有個K2小朋友嘅我，集集都有反思位」、「臨尾眼濕濕，應該係我極度眼淺」、「家長睇得好有共鳴，最尾龜兔賽跑變龜兔去旅行好好笑」、「晚晚個故事都好感人」、「結尾個Super Daddy Man都好溫馨 加晒分」、「周家怡好好戲，同梁詠琪嗰場戲講唔想小朋友咁快大，完全做到媽媽嗰個感覺！超讚！」、「好好睇，好有共鳴，有小朋友嘅就會知」、「始終係呢套既情感力量貼地，每件事都合理發展，笑中有淚，每位都好用心做自己角色，特別班小朋友，馬田真係好得意好搞笑」及「晚晚追，太有同感」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！