《各位觀眾4條傾》Bob嘲有人扮嘢戴黑超 就算消音都睇到C君口形話係佢?

·5 分鐘文章
《各位觀眾4條傾》
《各位觀眾4條傾》

J2特備節目《各位觀眾4條傾》由J2台創意總監C君(鄭詩君)、農夫拍檔陸永、林盛斌(Bob)及麥美恩擔任主持,喺最新一集中四人大談各大型頒獎禮嘅趣事及尷尬時刻,期間除咗不斷爆料之外,仲笑料百出。

喺節目一開頭,C君就話Bob重視自己大合照嘅企位,仲不停問人想企第一行,定係一年賺三千萬,Bob仲話多數藝人都係話賺三千萬。Bob仲會喺頒獎禮綵排上留意藝人鍾意戴黑超,C君指Bob曾經講過:「呢個已經唔認得個樣㗎啦,仲戴超?」陸永再話:「我見到佢有本簿mark㗎,邊個戴咗超呀今日?」之後,C君再扮埋Bob嘅表情講:「哦,原來呢個叫XXX!」雖然呢位藝人嘅名稱被製作組消咗音,不過睇C君嘅口形就疑似係歌手伍富橋。C君其後再話自己認得呢位藝人,只係阿Bob唔認得佢,C君並話阿Bob會評論邊位藝人可以戴黑超。

農夫過往都出席過唔少音樂頒獎禮,陸永就講到某個電台嘅頒獎禮會有特別多得獎者,Bob就話目的係想百花齊放,每一年都接近有一百個獎項,出席者都幾乎會有機會攞獎。C君就記得Bob曾經同佢講:「喺呢度攞一個獎等於冇攞過獎」。之後,農夫講出自己嘅攞獎趣事,佢哋曾經憑《舉高隻手》奪得十大中文金曲,喺兩至三年內同一個頒獎禮都冇攞獎,之後拎咗「最佳進步獎」銀獎,C君話:「我退步到咁樣都攞最佳進步獎」,令到佢哋都諗唔明。

農夫講頒獎禮嘅經典事件,C君就話有一年嘅新年倒數活動,有一單位就被邀請出席並上台表演,不過該單位喺台上冇表演,仲講咗一段對對主辦單位嘅肺腑之言,結果全場靜晒。之後農夫再話翌日要出席另一個頒獎典禮,所有歌手都喺度討論呢件事,而該單位亦有出席,呢次係第一次冇歌手討論邊個會攞獎。之後,佢哋再爆出頒獎禮嘅笑料,C君話:「我哋好多年都係坐,有個單位(同佢哋)好好朋友,次次都一齊坐一齊傾,有一次我哋覺得神奇到,你不停睇人攞獎,你自己唔知喺度做咩,最多咪傾下計,但你又唔可以傾得太大聲,因為好莊重,結果嗰個單位冇嘢做到攞咗個飯喺度食!」陸永話:「叉雞飯,傾傾下計你望住佢,佢食緊叉雞飯,我哋被佢啟發咗嘅!」

農夫繼續再爆同年頒獎禮影大合照嘅趣事,C君話:「頭四排都冇資格呀,排到第六行,因為我哋唔同其他台㗎嘛,有啲場務喺台上好緊張,你係企第六行,你係企第五行。呢個人影相由第六行一路行落去,自己企咗第五行,場務就鬧返佢上去第六行。場務一行開,佢行咗去第四行,返嚟再鬧佢。去到真正影大合照嘅時候,佢係企喺陳奕迅隔離。」結果全場爆笑,兼將呢個人個名寫喺白紙上,Bob和Mayanne知道後都表現驚訝。

最後仲有一件趣事令到Bob即場噴水爆笑,陸永就話喺一個音樂頒獎禮綵排時:「成班人上去踩完台返落嚟,唔知點解個地有啲燒燒地,沿路有啲黑色燒焦物體,個個喺度睇下咩事,我哋一路跟住入去坐化妝間,一路跟住啲燒焦物體,追到一個歌手嘅腳嗰度,係佢呀!佢隻鞋溶咗呀!」C君續話:「越行越矮,因為嗰個人隻鞋底溶咗!」之後,Bob遞上白紙,陸永寫上人名後,Bob即場噴水爆笑。

《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
伍富僑
伍富僑
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖
《各位觀眾4條傾》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能