《大步走》劉穎鏇入行5年備受力捧 盼努力工作接母親回港同住

劉穎鏇（Tiffany）擁有超長美腿同模特兒身型，2016年參選港姐勇奪亞軍，入行後備受力捧，係無綫上位小花之一。多年嚟以健康爽朗形象示人嘅劉穎鏇，喺熱播中嘅《大步走》升呢做女二，飾演陳山聰失散多年嘅女兒郭貝兒 （Belle）／袁雙雙，劇中佢經常以運動裝打扮示人，其44吋半長腿更成為焦點，迅速吸引觀眾嘅關注，更有網民話每晚只係期待睇佢跑步。

劉穎鏇喺劇中飾演富商郭皇普（蔣志光飾）嘅繼女Belle，呢對「哎吔父女」感情溫馨。其實現實中嘅Tiffany同爸爸嘅關係都非常之好。喺美國洛杉磯長大嘅劉穎鏇，2016年回流香港參選港姐，獲得亞軍後就留喺香港發展，劉爸爸就放棄工作，選擇提早退休返香港照顧佢，而劉媽媽就繼續喺美國工作`。近日Tiffany就被傳媒影到佢喺活動結束後，就揸車去將軍澳接爸爸，返屋企之前佢哋仲去咗新蒲崗食嘢醫肚。

劉穎鏇喺5至6歲嘅時候開始打籃球，當時佢媽媽都會到場支持，而爸爸就因工作好少現身，直至佢14歲，爸爸都會請假去睇佢每一場比賽。Tiffany曾經喺訪問時講過佢對演戲嘅興趣係從小培養，因為自細爸爸媽媽同婆婆都好鍾意睇無綫劇集，而佢學廣東話嘅其中一個原因就係同屋企人溝通。

孝順嘅Tiffany仲話過自細父母都冇分開過，因為佢令到父母分隔兩地，所以佢喺返香港初期就定咗一個條件俾自己，就係喺香港嘅開支都由佢俾。另外，媽媽仲喺美國工作，現時佢哋只能夠視像通話，同時佢亦擔心媽媽自己留喺疫情嚴重嘅美國，所以佢再定多個目標俾自己，就係自己再俾心機啲，媽媽就可以嚟香港一齊住，到時由佢去照顧返父母。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！