《大步走》多靚女演員助陣 姚子羚／劉穎鏇／趙希洛／陳自瑤...

近年唔少人愛上跑步，而無綫亦食住熱潮推出以跑步為題材嘅劇集《大步走》，劇集仲搵咗唔少靚女助陣，所以有一定嘅吸引程度。而家就同大家睇下《大步走》有邊啲靚女演員參演啦！

姚子羚
現年40歲嘅姚子羚（Elaine），02年參加《TVB8全能主持比賽》後入行，03年就有份參演首套劇集《當四葉草碰上劍尖時》，之後更獲得唔少演出機會，喺《酒店風雲》飾演壞表妹而獲得關注。之後佢喺劇集嘅戲份越嚟越重，例如：《秋香怒點唐伯虎》、《蒲松齡》、《四個女仔三個BAR》，2015年憑《張保仔》飾演炎貴妃一角獲得「最佳女配角」，演技備受肯定。近年Elaine被力捧升上做一線，成功晉身當家花旦之一。Elaine今次喺劇中飾演渾噩中女何家欣遇上失意田徑教練（陳山聰飾），受陳山聰影響漸漸感受到跑步嘅樂趣，之後佢哋仲會有感情線。

劉穎鏇
2016年港姐亞軍劉穎鏇（Tiffany），入行以嚟係以健康爽朗形象示人，除咗為綜藝節目《學是學非》及《3日2夜》等擔任主持之外，劉穎鏇亦有參與劇集拍攝，上年佢喺《踩過界II》飾演新晉女星被飾演富商落藥迷姦，可以話係佢入行以嚟最大膽嘅演出。今次Tiffany喺《大步走》飾演陳山聰失散多年嘅女兒郭貝兒 （Belle）／袁雙雙，因為跑步令佢哋父女重遇。至於感情方面，佢同羅天宇會飾演一對情侶。

趙希洛
38歲嘅趙希洛（Candice），07年參選港姐後入行，之後一直默默耕耘，多年嚟都係做配角居多，由於經常飾演癲婆角色，而且仲要演得入型入格，因此被封為「無綫御用癲婆」，直至今年終憑《金宵大廈》中憶子成狂嘅何太一角，揮低對手奪得「最佳女配角」。今次佢喺《大步走》唔再做癲婆，飾演姚子羚感情好好嘅細妹何家玲。

陳自瑤
現年39歲嘅陳自瑤（Yoyo）係模特兒出身，04年憑《赤沙印記@四葉草2》而為人認識，之後開始參與劇集拍攝，例如《法證先鋒》、《宮心計》、《公主嫁到》及《我的如意狼君》，不過星途平平。上年終憑《那些我愛過的人》飾演錢莉媛一角彈起，演技獲得觀眾讚賞。今次佢喺劇中飾演敢愛女強人刑可梔，視姚子羚為競爭對手。

劇集除咗以上幾位主演嘅女演員之外，仲有李思雅、李君妍、黃文意、鄧卓殷及文凱玲等靚女參演㗎！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！