《女神配對計劃》王維燁面試片瘋傳被封「林敏驄2.0」 本尊留言回應：一切都是為了節目效果
由「金牌媒人」林盛斌（Bob） 主持嘅TVB全新戀愛綜藝真人騷《女神配對計劃》成為近日熱話，節目為「東張女神」梁敏巧（Maggie）、「《愛回家》女神1號」葉蒨文（Sophie）、「《愛回家》女神2號」李芷晴（Stephanie）、「扮嘢女神」關嘉敏（Carman）和「童顏女神」羅毓儀（Yuki）公開搵男友！除咗五位女神外，早前一眾參加者亦都備受關注，而王維燁（Jason）更被封為「林敏驄2.0」。
參加者面試片段喺早前曝光，隨即喺網上掀起熱話，講到最備受關注嘅一定係被封為「林敏驄2.0」嘅王維燁（Jason），除咗對答有獨特風格之外，佢嘅「東莞和廣州」嘅異地初戀及「髮型論」都突顯其自然及搞笑一面，連葉蒨文都主動話想同佢「瘋狂傾偈」。唔少網民仲留言話佢好好笑同好想佢入圍，例如「第二位一定要留低呀，好好笑🤣🤣🤣」、「第2個好好笑😂9唔答8，唔似扮」、「第二個周星星，睇多次都咁好笑😂」、「第2個，仲好笑過睇林敏聰」、「第二個太好笑，但自己講嘢又唔笑….」、「第二個好勁，笑到肚痛」、「飛左第二個我唔會睇架」、「已讀亂回的代表」、「欣賞佢嘅問非所答😂😂」、「以為睇緊喜劇之王」、「笑到眼淚水都標」、「呢個唔入選，天理不容！」及「呢個真係最好笑 係咪睇太多麥兜」等等。
片段除咗喺香港瘋傳，連內地平台亦有廣傳，結果仲吸引王維燁本尊留言回應，佢表示：「本人王維燁出面稍作澄清，現場錄製半小時，現在濃縮到兩分鐘，有些回答的都被刪減了，一切都是為了節目效果。」王維燁嘅留言令佢抖音帳號曝光，其抖音帳號有多條佢出席活動表演嘅片段，同佢嘅面試時俾人嘅感覺截然不同！
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
