《好聲好戲》褒獎配音員虛偽？ 大台為慳成本cut粵語旁白 配音員唔續約流失一半人手

大台新綜藝節目《好聲好戲》本周開播，形式類似內地節目《聲臨其境》，搵一班藝員參賽學配音，仲特登搵經驗豐富嘅劉江及TVB報幕員陳欣做評審，又表揚「配音員用心及用好聲，為我地帶來一幕幕好戲」。

講到咁重要，但係大台因為盤數唔靚而開源節流，近年對配音組絕不手軟。

翻查資料，TVB2014年起停辦粵語配音藝員訓練班，直至今年曾志偉上場先復辦。而過去幾年嘅「瘦身」行動，至少2次配音組都「有幸入圍」。

本來配音組有七十幾人，大部份以3年合約形式聘用，2018年中TVB裁員，有4名年資約6年嘅配音員約滿後不獲續約。當時TVB高層鄭善強否認係裁走4位配音員，強調「係唔續約」。

而去年另一次裁員，全台一成非藝人員工受影響，有超過40年經驗、曾經為《足球小將》小志強及《聖鬥士星矢》星矢發聲嘅資深配音員馮錦堂不獲續約。去年逝世嘅演員及配音員譚炳文當時曾經透露，配音員約滿都冇得續約，有幾位已經因此而要離職。據估計，截至今年初配音組已經有超過30人離任。

近年TVB需要配音嘅節目大幅減少，日劇台去年停播，餘下mytvSUPER韓劇及華語劇台，而部份配音工作就外判。至於財經資訊台外購節目就由記者負責旁白。有廿幾年歷史嘅明珠台「麗音雙語廣播」，去年起已逐步取消，首播嘅電影同綜藝節目，都唔會有粵語配音選擇。由於合約配音員人手銳減，如果劇集或動畫角色較多，就可能出現「一人分飾n角」嘅情況。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！