《好聲好戲》馮盈盈爆冷獲好評 陳安瑩超哂班 網民:點同傻姑鬥呀

·5 分鐘文章
《好聲好戲》
《好聲好戲》

無綫全新綜藝節目《好聲好戲》喺前晚(3日)首播,節目搵嚟阮兆祥和賴慰玲擔任主持,並一共有12位藝員參賽,首輪登場嘅就有「過期鮮肉」何廣沛、「爆騷女王」馮盈盈、「國際級藝人」易宇航及「傻界始祖」陳安瑩。4位參賽藝員先後於後台即場為一段戲配音,之後被汪明荃(阿姐)、劉江及陳欣等評判猜猜佢哋是誰同埋俾評語。

喺首集,首個出場嘅何廣沛大膽聲演評判劉江喺《平安谷之詭谷傳說》怒打「二姨太」蘇玉華嗰一幕,當場被劉江直指佢好渣、甩嘴同把聲好虛。入行8年嘅何廣沛話身邊啲人都話佢把聲好高音同唔夠厚,呢啲係佢嘅致命傷,同時亦好多謝評判們直接批評佢,令佢知道自己嘅不足,希望之後有改善嘅空間。之後就輪到馮盈盈,佢選擇聲演《宮心計》小演員哭別臥床田蕊妮嘅場面,期間馮盈盈扮小朋友聲同唱歌。唔少評判對佢表現讚不絕口,馮盈盈當場感動到喊,連假眼睫毛都甩埋。馮盈盈指入行以嚟一直有好多聲音話佢懶音好嚴重、咬字有問題同埋把聲好難聽,所以佢好想嚟呢個比賽學嘢同改善呢啲問題。

《好聲好戲》截圖
《好聲好戲》截圖

第三個出場嘅藝員就係易宇航,佢選擇挑戰《洛神》馬浚偉含淚唸七步詩嘅場面。劉江就直言佢嘅表現唔太合格,而阿姐原本都覺得表現有啲僵硬,不過一見到佢係外國人就有少少嚇親,仲即時話佢已經好努力。易宇航笑話自己冇機會贏,不過就好想挑戰自己。最後輪到陳安瑩壓軸出場,佢竟然一人聲演《神鵰俠侶》小龍女、孫婆婆及少年楊過三個角色,配音經驗豐富嘅佢當然獲得大量好評。

《好聲好戲》截圖
《好聲好戲》截圖

去到第二集,比賽第一回合就正式開始。何廣沛選擇聲演《義不容情》溫兆倫喺行刑前見哥哥最後一面嘅場面,不過評判們就似乎唔係好buy,仲獲得4盞唔合格嘅紅燈,劉江仲話佢唔合格,因為戲就係戲,唔可以隨便改力度。而陳欣亦指佢口形甩晒。事後何廣沛就話知道自己表現差,多謝評判嘅評語。至於,馮盈盈就選擇聲演《鬼同你OT》鬼魂胡定欣帶田蕊妮去面試嘅場面,呢幕「神同步」獲5位評判評合格及2位不合格。馮盈盈被問到點樣改善懶音,佢就話要認清自己嘅問題,訓練班後佢上咗一個正音班,並發現自己喺發音時,條脷喺口腔擺位有問題。再之後佢就去搵言語治療師,將一啲經常講錯嘅懶音逐隻字去矯正,為咗呢個比賽佢再搵配音老師幫忙。另外,佢因為呢個比賽佢緊張到失眠、練習到喊同埋內分秘失調,自己已經連續3星期嚟M。

之後就輪到易宇航,佢選擇聲演《流氓大亨》萬梓良面對已經變成植物人嘅鄭裕玲嗰一幕,結果獲得6位評判評合格及1位不合格,阿姐俾紅燈嘅原因係覺得佢把聲唔襯萬梓良嘅體型。而劉江就反而俾綠燈,原因係佢嘅戲劇感同節奏都掌握得好好。另外,陳安瑩將會喺今晚登場。

唔少網民睇完呢兩集後都話節目值得一睇,仲對馮盈盈另眼相看,紛紛留言大讚佢,例如「fyy勁對嘴型」、「Fyy出奇地ok」、「fyy不如轉幕後去做配音喇」、「FYY 配得幾出色」及「Fyy真係落個功夫 抵佢甘多job」等等。另外,亦有唔少網民認為陳安瑩超哂班,應該去做評判及對參賽藝員唔公平,留言話:「好唔公平。十二位參賽者大參差了。根本冇得鬥。點同傻姑鬥呀!」、「陳安瑩都唔同級數點比賽」、「陳安瑩係參賽者?佢超晒班喎!唔公平」、「傻姑本身就係配音員 唔會屈晒機咩」、「等等先, 但陳安瑩超哂班, 配左咁多年都照計?」及「點解佢咁勁仲會上黎比賽」等等。

至於評判方面,唔少網民認為劉江嘅評語非常好,相反汪明荃就未夠料做主席評判,留言話:「劉江比意見好有建設性」、「劉江老師好嚴格 好事」、「評判用呀姐真係好趕客 配音同做戲唔一樣」、「佢坐喺度。無釐頭講兩句。根本搭唔上咀。咁又話首席評判。」、「比賽有同情分?阿姐好搞笑。」、「佢評語好c9完全冇建設性」、「根本就九唔搭八,劉江做首席就差唔多,揾以前配曾志偉或成龍嗰D仲正啦」及「亞姐都吾夠料做」等等。

《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖
《好聲好戲》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能