《好聲好戲》黃翠如配音演出有驚喜 有冇機會殺入總決賽？

無綫綜藝節目《好聲好戲》第一組比賽由馮盈盈爆冷勝出，而第二組嘅參賽藝人就有鄧智堅﹑黃翠如﹑張振朗和港姐冠軍謝嘉怡。被稱為「大廚人妻」嘅黃翠如演戲聲線一直備受批評，不過佢今次嘅表現令人驚喜，獲得評判好評。

喺節目中，黃翠如話聽到好多人對佢嘅評語就係佢把聲好難聽，佢想進步所以就參加呢個比賽。喺呢幾集，黃翠如先後聲演過《來自喵喵星的你》「Natasha」楊秀惠去色誘陳豪、《皆大歡喜》「紗紗郡主」苑瓊丹潛入古廟攝灶罅、足球現場評述及《巨人》「李秀慧」李司棋綁架萬梓良。喺率先挑戰嘅《來自喵喵星的你》嗰幕，黃翠如獲得阿姐讚佢演得投入，而一向嚴謹嘅鼎爺都大讚佢「有嗰種味道，夠姣呀！」。之後，佢再突破自己聲演《皆大歡喜》嘅紗紗郡主，雖然佢把聲好「卡通聲」，不過依然獲得七位評判一致俾綠燈過關，當中鼎爺仲笑指「佢都係唔好做演員喇，做配音好過呀，做演員麻麻地」，而阿姐就略嫌佢聲演時太「卡通化」，與角色唔太配合，不過好彩佢演得夠放。聽完評判嘅評語後，翠如開始眼泛淚光，仲好感動話「因為我演戲以來把聲成日俾人抨擊，所以我成日覺得不如你俾我演個啞嘅算啦，所以好多謝。」

去到噚晚嗰集，黃翠如就搵咗林盛斌（Bob）做聲演拍檔，合演《巨人》李司棋綁架萬梓良嗰一場戲，結果獲得3綠4紅嘅分數。首先阿姐就認為翠如揀啱拍檔，Bob配萬梓良嘅聲音效果不俗，仲話翠如嘅表現有配合到李司棋嘅演出。俾紅燈嘅評判梁偉德及曾秀清就認為佢嘅層遞感唔夠突出同埋唔夠狠，而同樣俾紅燈嘅曹啟謙就話感受唔到恐懼及去到激動位時控制唔到把聲。

節目出街後，唔少網民都認同鼎爺嘅評語，認為佢做配音好過演戲。另外，亦有唔少網民認為佢已經好努力，留言大讚佢進步咗好多，例如：「翠如進步咗好多, 阿 Bob 帶嚟好大好大嘅驚喜！！」、「翠如真係好出力好盡力入角, 慢慢改善, 加油」、「我覺得翠如做得好好，尤其睇佢做精神病人的樣，落左好多心機！」、「睇得出黃翠如好努力，同埋配得好！」及「呢段難度好高，翠如你已經做得好好，感情同語調都表達得好好！！叻女！！」等等。第二組嘅出線者將於今晚揭盅，大家又認為黃翠如有冇機會殺入總決賽呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！