《尚氣》新劇照曝光 被指似TVB製作 網民評陳法拉老咗：同梁朝偉差20年但唔覺

Marvel首部華人超級英雄電影《尚氣與十環幫傳奇》將於9月2日香港上映，參與演員涉及香港人熟悉嘅梁朝偉及陳法拉，教人期待，不過當網民睇完官方日前釋出嘅劇照，卻直言電影充滿TVB味道。

59歲梁朝偉喺《尚氣與十環幫傳奇》入面飾演反派「徐文武」，為尚氣（劉思慕飾）父親，陳法拉則飾演尚氣母親「映麗」，劇情講述梁朝偉自細栽培尚氣成為「功夫大師」，但長大後嘅尚氣只想隱姓埋名生活，梁朝偉就帶住十環去搵尚氣，整套電影充斥唔少對決打鬥場面。Marvel近日公開梁朝偉同陳法拉喺樹林嘅劇照，二人伸出十環疑似對戰，不過網民就表示佢哋兩個似玩緊泡泡槍，認為其特技效果不如其他Marvel英雄片，指畫面風格好似TVB：「以為睇緊 cctvb舊劇」、「d圖色係咪特登tune過？似足70年代如來神掌feel」、「勁似TBB低成本製作咁」、「唔講以為係阿姐後生拍嗰啲戲嚟」等等。

另外，亦有網民指化上淡妝演出嘅陳法拉個樣老咗好多，唔講都唔知佢同對手梁朝偉相差20年，紛紛留言指：「唔知話偉仔keep得好定法拉老得快，兩個差成20年但唔多覺」、「細個成日j陳法拉，holiday、銀屏、小翠勁正，依家好老」、「陳法拉塊Pizza面」以及「女人一老真係女神都死」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！