《得寵先生》票房報捷 唐狗主人救狗義工有共鳴 盧慧敏Amy謝票超感動 熱情狗狗興奮錫甩耳環

《得寵先生》上映十天票房已突破250萬港元，談論度越來越高，不少看過電影都讚題材特別，故事感人，有笑有淚，尤其是戲中狗狗演員，個個都精靈可愛，演技爆發。近日隨電影團隊四出謝票的女主角盧慧敏（Amy）得知票房成績節節上升，叫好叫座表示好興奮。

前晚Amy再出動到將軍澳的戲院「人寵共融」場次謝票，有些身形較大的狗狗坐在主人座位旁邊，有些小狗狗被主人抱在懷裏，場面溫馨。其中有觀眾帶著兩隻狗狗入場，她說：「好有共鳴，尤其是漁護署嗰幕，因為佢兩個（指狗狗）都係從漁護署救出嚟，所以我由頭喊到落尾！」而另一位觀眾說：「我都係領養唐狗，好有共鳴，呢部電影好真摯。」

完場後，Amy蹲在地上逐一與觀眾和狗狗合照留念，有一隻狗狗與《得寵先生》飾演「燒腩」的狗狗演員Little很似，Amy表示驚嘆，牠叫「妹妹」一歲半，但像BB一樣細膽害羞。而另一隻狗狗就特別熱情，對Amy一見如故，飛撲到她身上，咬她外套上的小狗毛公仔又狂錫她，氹得Amy哈哈大笑。Amy說：「佢好活躍、好興奮，影相時撲埋嚟咬住我（膊頭上）隻公仔，佢以為係玩具，然後不停錫我，仲錫甩咗我隻耳環，好彩佢無食到。每次人寵場謝票我都好開心，好似被一大班天使圍住，原本去到尾站我有啲攰，但見到佢哋，我又充滿力量。」

電影票房報捷，Amy非常開心，說：「衷心多謝支持香港電影。我最近去咗好多不同場次謝票，比較特別嘅有『口述映像』和『人寵共融』，即係主人帶埋狗狗一齊入戲院睇戲。每次一入到人寵場謝票我都好感動，因為大部份觀眾都有養狗狗，所以佢哋感受特別深，入場見到個個觀眾睇完都眼紅紅。佢哋仲同我哋講，多謝拍咗呢部電影，好感動。」又說：「我見到好多天使喺我哋身邊，好多好似『悅娜』（Amy戲中角色）嘅動物義工，好多心地好好嘅人喺呢個世界上。所以我希望更多人入場支持呢部電影，感受多啲，無論人與人之間嘅關係，甚至動物義工面對嘅生活問題，佢哋心態真係好強壯、有好好嘅靈魂和愛心。」Amy越講越感動，又講到眼紅紅了。