《愛·回家之開心速遞》搶眼角色又走一個？傳「曹總」劉一飛離巢無綫

無綫處境劇《愛·回家之開心速遞》深得觀眾喜愛，除咗劇情輕鬆搞笑又溫馨之外，一班演員亦演得非常出色，佢哋更成功憑劇中角色成功入屋，當中包括飾演曹總嘅劉一飛。不過日前有網民發現佢嘅配音藝員資料喺無綫官方藝人網頁已經被刪除，今日有報道指劉一飛已經完約無綫，亦有指佢身體不適。

劉一飛飾演嘅曹總喺第一輯《愛‧回家》開始出現，當時已經有唔少網民大讚劉一飛扮起土豪入型入格，搞笑得嚟又可愛。去到《愛·回家之開心速遞》，佢係曹氏集團主席，性格繼續為人正義、零架子又肯幫人。至於感情方面，佢仲曾經鍾意過熊若水（呂慧儀飾）和沈佳儀（姚瑩瑩飾）。較早前，佢仲投資《金剛門傳》，所以與滕麗名及袁文傑飾演嘅熊尚善和潮偉有唔少對手戲。雖然曹總戲份唔多，不過佢就非常搶鏡，唔少網民都好鍾意佢。

有傳媒致電劉一飛查詢，喺電話接通後佢將電話交畀一名女子回答，呢位女士就問記者做咩問呢啲問題同埋叫記者問返公司。至於袁文傑喺接受傳媒查詢時，佢就話都有幾個月冇一齊拍戲，處境劇經常會有人突然離開，唔知劉一飛同公司仲有冇約。

如果劉一飛真係已經離巢無綫，咁曹總呢個角色可能唔會再喺《愛·回家之開心速遞》出現。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！