《把關者們》首播 黃智雯又做Madam被網民嫌:齣齣都一樣

·3 分鐘文章

TVB同ViuTV喺噚晚9點半時段都有新劇推出,TVB嘅《把關者們》由袁偉豪、黃智雯、陳家樂、王敏奕、郭子豪及陳自瑤等人主演,而ViuTV嘅《超感應學園》就有蔡凡熙、劉奕兒、MIRROR人氣成員姜濤及盧瀚霆(Anson Lo)等人參演。一套係以海關及查案為題材;一套以校園奇幻為題材,相信會吸引唔同嘅觀眾群捧場。想知網民們睇完《把關者們》有咩感受,快啲轆落去睇下啦!

變咗愛情劇
噚晚首播主要圍繞一宗販運毒品案,雖然有調查及小型槍戰,不過劇情都拉到去感情戲,包括Madam Kwan(黃智雯飾)與男友鋒Sir(袁偉豪飾)send甜蜜短訊及Madam Wan(王敏奕)喺槍戰時被鋒Sir勇救。唔少網民都頂唔順,紛紛留言:「諗住會好刺激….原來又係小品愛情劇 佩服」、「最終又係愛情片,又離哂題,揾一次唔加入愛情元素可能會好D」、「睇個款多數又係變左情情搭搭」、「最後咪又係多角戀愛情劇」及「咪又係一套愛情片轉左做海關包裝」等等。

同《刑偵日記》撞主角
《把關者們》及早前播出嘅《刑偵日記》都由袁偉豪、黃智雯及王敏奕主演,就算無綫唔覺得悶,一班網民已經嗌悶,仲問無綫係唔係唔夠藝人。

黃智雯又做Madam
黃智雯喺2008年開始拍劇,多年嚟拍過唔少劇集,近年仲多次飾演Madam角色,當中包括《十八年後的終極告白》Madam Yuen、《使徒行者3》Madam G及《刑偵日記》Madam星。今次佢喺《把關者們》都係飾演商品說明調查科總貿易管制主任關佩欣,係一個做事細心及與下屬相處融洽嘅Madam。黃智雯飾演Madam嘅次數太多,搞到網民們對佢嘅角色傻傻分不清楚,仲留言話:「黃智雯每一套戲都係呢啲look、呢個髪型、一樣嘅演技、一樣嘅表情.」、「以前好啲,都有關二嫂睇吓,依家就:」、「又是madam, 都分不出哪一部了」及「佢同喺使徒行者3、刑偵日記做嘅係一模一樣 …」等等。

王敏奕好靚女
現年29歲嘅王敏奕身形弗爆又靚女,係唔少男士心目中嘅女神。今次佢喺劇中飾演cool爆嘅「Madam Wan」温芷祺,唔少網民睇完佢嘅演出後,都紛紛留言大讚佢靚女,例如「Madam Wan 好靚女」、「第一次見劇中有咁索爆Madam」、「王敏奕好靚呀!」及「Venus好正」等等。

《把關者們》截圖
《把關者們》截圖
《把關者們》截圖
《把關者們》截圖
《把關者們》截圖
《把關者們》截圖
《把關者們》截圖
《把關者們》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能