《掃毒2》涉嫌抄襲？內地導演告上法庭要求賠償1.2億港元

2019年電影《掃毒2：天地對決》由邱禮濤執導，劉德華監製及主演，並由古天樂、林嘉欣及苗僑偉等人主演，電影贏得口碑之外，票房亦收近15億港元，而《掃毒3》將會集結3大影帝郭富城、劉青雲及古天樂，早前已經正式開拍。不過近日就有內地傳媒報道指成都環球博納文化傳媒有限公司董事長苟鈺生入稟控告，指《掃毒2》涉嫌抄襲佢喺2006年嘅作品《完美情人》，要求賠償9999萬人民幣（約1.2億港元）、喺公司網站刊登道歉啟事、承擔所有訴訟費用及本案件嘅支出合理費用60萬元。

報導指苟鈺生認為《掃毒2》與《完美情人》有好多相似嘅地方，例如人物設定、情節、故事背景、人物關係、敘事結構、結局、拍攝手法、角色職業、人物海報設計及服裝設計等等，而佢喺上年年底發現《掃毒2》有抄襲嘅嫌疑後，佢就用咗半年時間蒐證，並將證據遞交法院，據講目前北京知識產權法院已立案受理。

另外，苟鈺生仲話劉德華唔係第一次抄襲佢嘅作品，佢喺2007年曾向劉德華旗下公司映藝娛樂自薦一份名為《和劉德華一起唱歌》嘅電影劇本，而雙方亦有洽談合作，不過因2008年汶川大地震，佢要回鄉處理後事而暫停原有嘅工作。不過之後佢就發現2015年電影《我的少女時代》嘅部份情節與《和劉德華一起唱歌》相似。

對於《掃毒2》被指控侵權一事，電影負責人林小明喺接受傳媒訪問時就話自己冇睇過《完美情人》，強調《掃毒2》係原創劇本，仲覺得「風馬牛不相及」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！