《換命真相》首集反應不俗被讚有追看性 劉佩玥又死老公 唔通想同楊卓娜爭做「TVB御用寡婦」？

以穿越為題材嘅無綫台慶劇《換命真相》喺噚晚（18日）首播，劇集由譚俊彥、鄧佩儀及張頴康主演，劇情主要講述工程師時光（譚俊彥飾）獲得重生機會，希望扭轉自己命運及阻止災難發生。想知網民們睇完第一集有咩感受？快啲轆落去睇下啦！

劇情明快有追看性
第一集就已經講述結構工程師Tim檢查過嘅唐樓倒塌，而佢為咗調查真相而慘遭滅口，更連累女朋友Hailey（鄧佩儀飾）及 細妹家純 （蔣家旻飾）被殺害。而佢就穿越時空返回唐樓倒塌前100日，希望可以扭轉命運及阻止悲劇發生。唔少網民都認為劇集節奏明快及有追看性，紛紛留言話：「剛看完第一集,覺得有劇情可追看.」、「故事幾有意思」、「第一集鋪排得唔錯，可以繼續追看」、「嗰條橋幾特別 即係話譚俊彥一路都知道曬所有嘢」、「節奏好快，頭一節已經穿越時空」及 「終於有劇追喇」等等。

CG場面好假
網民們一向唔太欣賞無綫劇集嘅特技效果，而噚晚《換命真相》首集亦有CG畫面，就係唐樓臨倒塌前嗰一幕，不過今次無綫都好似冇咩進步，繼續被網民指CG好流，例如「倒塌CG..做得好假」及 「特技做得好差喔。」等等。

四女角少女時代好吸睛
劇集搵嚟吳天兒、黎康祺、羅毓儀及倪嘉雯分別飾演陳庭欣、鄧佩儀、蔣家旻及劉佩玥嘅少女時代，而呢幾位年輕演員喺噚晚嗰集都有唔少戲份，當中嘅羅毓儀及倪嘉雯更備受網民關注，留言大讚佢哋靚同好可愛，例如「羅毓儀cutecute」、「倪嘉雯超正」、「做moon少女版個學生妹咁正既？TVB收埋收埋D人」及 「Yuki幾可愛」等等。

劉佩玥又死老公 不過好搶戲
劉佩玥（Moon）喺劇中飾演楊紫山，佢係一個做事我行我素同埋任性衝動嘅人，而且佢仲已經經歷個兩段婚姻，不過兩任老公都已經過咗身。唔少網民睇完佢噚晚嘅演出後，都紛紛留言大讚佢演技不俗及非常搶戲，例如「Moon 呢場戲做得唔錯喎，夠喪」、「阿Moon好搶戲，一流」、「moon好搶戲 佢既出場簡直係突顯三個女仔既性格分別」及 「幾吸引幾好睇.暫時Moon最搶戲」等等。另外，亦有網民留意到阿Moon再一次飾演寡婦，仲搞笑留言問佢係唔係要同楊卓娜爭做無綫 「御用寡婦」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！