《海闊天空》成Youtube首個播放1億次廣東歌MV 十大排名Dear Jane佔3首

近年多咗人注意廣東歌，上Youtube睇MV係其中一個聽歌途徑。Beyond嘅經典作《海闊天空》最近成為Youtube首個播放逾1億次嘅廣東歌MV。

《海闊天空》收錄喺1993年Beyond專輯《樂與怒》，亦係Beyond 四人時代嘅最後專輯。當年Beyond仲係華納唱片旗下，而佢地後來簽約嘅唱片公司滾石，2011年將《海闊天空》官方MV上載到Youtube。十年半過後，《海闊天空》嘅播放數衝破1億。

呢個MV唔止令人聽到家駒動人歌聲，亦見到好多值得紀念嘅畫面，包括Beyond最後一次公開演出嘅港台音樂會片段、歌迷喺啟德機場接機畫面，MV入面家駒穿著嘅綠色牛仔褸，亦伴隨佢入土為安。

好多歌迷都留言分享感受，而且唔止香港人，台灣、馬來西亞都有唔少人聽Beyond嘅歌成長，甚至將Beyond作品介紹俾下一代。

而喺Youtube廣東歌MV播放次數排行榜上，第二位係G.E.M嘅《喜歡你》，已經播放9130萬次，同樣係出自家駒手筆。

至於十大廣東歌MV當中，有3首來自Dear Jane，分別係第3位《不許你注定一人》、第4位《哪裡只得我共你》同第6位《到此為止》。林奕匡嘅《高山低谷》排第5，第8－10位分別係Supper Moment《無盡》、C AllStar《天梯》同JW《矛盾一生》。除咗Beyond以外，只有陳奕迅嘅《陀飛輪》（第7位）係唯一一首千禧前出道歌手作品。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！