《繁花》收視低迷輸《東張西望》 《森林女王》接捧 網民列7大失敗位

繁花
繁花

由王家衛執導及擔任監製嘅第一部電視劇《繁花》逢周一至周五晚上九點半翡翠台播映,第30集將於本周五(12日)播出,下周一(15日)將由高海寧、鄧智堅聲演嘅野生動物紀錄片《森林女王》接捧播出。《繁花》去年底於內地播出時好評滿滿,豆瓣評分更持續高開8.7分,不過香港觀眾似乎唔多支持。翡翠台曾公布6月30日至7月1日收視,最高收視劇集為《反黑英雄》,擁最高24點(156萬觀眾),《繁花》最高收視只有15點(97萬觀眾),比起資訊節目《東張西望》最高收視24.2點(157萬觀眾)要低。對於香港收視率低於預期,網民就紛紛列出《繁花》嘅失敗位。

《繁花》失敗位1:無廣東話配音
《繁花》演員們全程用上海話拍攝,使觀眾更易代入90年代上海氛圍,翡翠台播出時,僅提供普通話主聲道及上海話次聲道選擇,未有提供廣東話配音,對觀眾未夠貼心:「點都應該要有廣東話配音啦,老人家點會睇字幕」、「直接放套普通話劇喺黃金時段,真係笑死人,仲開緊電視堆老人家你估真係坐定定追劇咩,邊食飯或者邊做家務『聽』電視就多」、「cut配音真係玩自己」等等,不過都有網民認為如果套劇配咗廣東話就感覺好唔啱Mood。

《繁花》失敗位2:內地劇一向欠缺話題
TVB過往都有外購內地劇,不過未見有太大討論度,唔少網民都話醒唔去近年有邊套內地劇係令人記得:「大陸劇紅得起有邊套?我剩係諗到環珠格格」、「近幾年咪延禧攻略」。

《繁花》失敗位3:太遲播放
《繁花》已於去年底於內地播出,有網民就指其實要睇嘅人都已經睇晒:「問題要睇嘅一早睇咗,唔睇嘅就唔會睇」、「網上有得睇,使乜每日睇廣告仲每日一集」、「要睇嘅大陸網幾個月前已經睇咗啦,無線太遲播囉。應該要同大陸同步播先得」、「一早新年果陣睇左啦,邊個會等到宜家先tvb睇,要重溫自己上網睇都得」等等。

《繁花》失敗位4:未認清觀眾群組
網民認為TVB未認清觀眾群組,指呢個時段多數係師奶睇,同時認為佢哋唔鍾意睇呢類型嘅劇,:「TVB知唔知係呢個時間嘅觀眾群組係乜嘢人?」、「班C9追愛回家都唔追呢套」、「香港班師奶都要睇畫公仔畫出腸嘅電影劇,繁花呢d主力鏡頭美學嘅野邊啱佢地睇」等等。

《繁花》失敗位5:唔係人人欣賞王家衛拍攝手法
唔少網民都話自己唔識欣賞王家衛拍攝手法,表示:「懶係有深度,懶係運用拍攝手法、鏡頭、顏色」、「王家衛佢啲場景不論日頭夜晚,室內定室外啲演員塊面都會反晒光,啲演員演技、服飾同場景都極造作 然後啲畫面明明可以一個鏡頭影晒,硬係要飛來飛去咁影」、「剩係講拍攝手法,已經覺得不知所謂,睇左少少片段已經頂唔順」、「我唔明點解個鏡頭要不斷咁轉取景角度、一場戲轉六七次畫面,作為觀眾既我真係睇得好辛苦,一啲都唔欣賞」等等。

《繁花》失敗位6. 背景音樂難令人難投入
網民認為《繁花》用交響樂做背景音樂令人難投入,指唔明點解唔用二胡。

《繁花》失敗位7. 演員無親切感
《繁花》主演陣容包括內地演員胡歌、馬伊琍、唐嫣、芷蕾等等,網民指對呢班演員都無咩親切感。

《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》
《繁花》

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!