《聲夢傳奇》參賽者唔識郭富城/古天樂 網民:點解可以咁離地?

·3 分鐘文章
See See TVB 影片截圖
See See TVB 影片截圖

無綫真人選秀節目《聲夢傳奇》有唔少年輕參賽者,早前更有參賽者唔認識前輩李克勤,被網民批唔尊重及缺乏專業知識。近日無綫旗下網台《See See TVB》就上載咗一條名為「《SeeSeeTVB面盲補習社》feat.聲夢傳奇」嘅影片,片中一眾參賽者大玩認人遊戲,遊戲中不乏一線歌手及演員,不過佢哋竟然唔認識,嚇親唔少網民。

喺片中,幕後人員會展示一張藝人照片,之後佢哋舉手並講出該藝人名字。第一題嘅答案係郭富城,大部分嘅參賽者都知道佢係邊個,不過15歲嘅詹天文(Windy)竟然答唔出,只係講咗3次「佢好靚仔」,旁邊嘅參賽者就提醒佢嘅姓氏,之後佢回答:「郭浩」,令到炎明熹都忍唔住反白眼。去到第二題嘅側田,參賽者們都輕鬆答出答案。

不過去到第三題嘅古天樂,一頭霧水嘅Windy問:「呢個係咪四大天王之一?」,炎明熹再一次反白眼,鍾柔美便回答「唔係」。不過答案公開後,鍾柔美顯得一面驚訝,因為佢原本以為係劉德華。輪到陳慧琳及鄭伊健嘅照片時,大部分參賽者都答啱,唯獨炎明熹就話:「我將佢同張衛健成日撈亂」。之後去到張學友時,炎明熹大聲回答係「張家輝」,而潘靜文(Sherman)雖然答啱,不過佢話:「本身我唔識,但係啲stickers令到我識」。去到Twins時,唔少參賽者都成功認出,不過姚焯菲(Chantel)及詹天文就唔認識。製作組問Twins有咩歌曲嘅時候,鐘柔美竟然唱出Cookies《心急人上》嘅歌詞「又不是八十年代......」

影片出街後,唔少網民認為參賽者離地,紛紛留言話:「點解班參賽者可以咁離地?」、「唔係嘛……做歌手個眼界咁窄。」、「windy簡直真係井底之蛙 1個都唔識。。。」、「經典大人物嚟㗎喎 咪再用年紀細嚟做擋箭牌啦」、「郭富城又唔識。古天樂又唔識。」及「客觀講,如果你要加入樂壇,的確需要認識樂壇前輩,多聽前輩嘅歌亦係一種學習。如果你對香港樂壇冇認識就話自己要做歌手,咁係侮辱緊自己嘅職業。」等等。不過亦有網民支持參賽者們,認為巨星級嘅歌手好耐冇推出新歌,年輕參賽者唔認識係好合理。

See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖
See See TVB 影片截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能