《聲夢傳奇》姚焯菲點擊破250萬拋離MIRROR新歌 網民質疑有水份?

無綫歌唱選秀節目《聲夢傳奇》進入白熱化階段，當中參賽者炎明熹（Gigi）及姚焯菲（Chantel）人氣急升，更被視為奪冠大熱人選。年僅14歲嘅姚焯菲憑甜美歌聲演唱《戀愛預告》震撼全城，被封為「國民初戀」，早前有傳無綫已經同佢簽咗五年合約，雖然姚爸爸就話Chantel目前以學業為重，不過睇嚟無綫有意力捧佢做旗下歌手。人紅當然是非多，近日就有唔少網民質疑Chantel版本《戀愛預告》嘅點擊率有「水份」。

姚焯菲《戀愛預告》嘅節錄片段喺YouTube點擊人次持續上升，片段上載不足三星期已經超過260萬，真係好犀利呀！不過有網民列出咗一系列嘅數據，將佢同人氣男團MIRROR近期新歌《Boss》作出比較。《戀愛預告》片段喺上載兩日後30萬嘅點擊人次，互動率（Engagement）只有4%，之後點擊率突然飆升，不過互動率卻下跌，令網民感到非常唔尋常。而遲佢4日上載嘅《Boss》MV嘅互動率就有7.5%，截至今日就有150萬點擊人次，比例上較為正常。

不過亦有Chantel支持網民認為唔可能造假，指網絡唔少片段嘅互動率與點擊率都係唔成正比，Chantel曝光率高，再加上與佢相關嘅關鍵字熱度持續上升，可見Chantel真係成功爆紅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！