《造美人》芷橋OK姐出局10強誕生 Ice現身《寶寶大過天》

ViuTV另類選美節目《造美人》進行得如火如荼，10強名單喺噚晚已經誕生，OK姐（胡靄琪）和芷橋（劉芷橋）雙雙出局，結果引起網民激烈討論。

OK姐喺節目中被視為黑馬，雖然佢嘅外貌唔係最標青，但係真性情令佢得到網民支持。不過佢喺受訓過程俾人一種唔認真同唔想變靚嘅感覺，節目組問佢問題時佢又諸多藉口，所以網民認為佢出局係好合理，例如「Ok都唔肯做 佢好似乜都冇參與過咁 咁真係冇計 點幫 比你免費玩都要你肯做番啲嘢先得架」、「Ok姐由頭hea到尾點留 話晒都係比賽黎，佢都唔想贏唔踢佢踢邊個」、「一定foul ok姐 次次都咁hea 玩得比賽 鬥hea 冇邊個觀眾想睇啦」、「ok姐無乜想變靚嘅心」及「Ok姐真係浪費viu大量budget」等等，亦有網民支持佢堅持自己嘅步伐。另外，有網民喺OK姐IG發現佢疑似刻意扮傻，原本只係打算「R專業團體的技術幫我咋 過得開心就算」，令人懷疑佢特登唔努力，力爭被foul。

而另一位出局嘅就係喊包芷橋，佢喺比賽中咩都喊一餐，例如未能即時晉身12強、 體內年齡係12人中最老等等，所以搞到唔少網民都覺得佢好煩。去到宣布佢被淘汰時，芷橋竟然冇變喊包，仲話變得更愛自己，同埋唔會再依靠整容。唔少網民睇完之後都紛紛話對佢改觀，例如「芷橋輸左反而樂觀左 呢種態度好好多 之前太令人討厭」、「芷橋其實真係進步幾多」、「foul完好似順眼咗」及「芷橋好似真係開心咗好多」等等。

另外，晉身十強嘅Ice（嚴楚翹）喺前晚被發現喺無綫劇集《寶寶大過天》出現，佢喺劇中飾演一名貴婦靚媽，與老公帶同囡囡去學校面試。Ice本身係無綫劇集嘅臨時演員，所以佢都有為唔少劇集拍攝，不過全部都有一啲唔起眼嘅配角，例如《愛．回家之開心速遞》、《伙記辦大事》及《十八年後的終極告白》等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！