《鐵拳英雄》首播被指同《城寨英雄》冇分別？網民：直接重播算啦

前名《唐人街》嘅《鐵拳英雄》演員陣容鼎盛，亦係由《城寨英雄》班底製作。劇集以曼谷唐人街為背景，講述30年代擅長八極拳嘅步天下（陳展鵬飾）一家去到曼谷唐仁街，步天下壯烈犧牲，步青雲（陳展鵬飾）弟妹意外失蹤，而母親丁細鳳（元秋飾）變得半瘋半痴；25年後，步青雲重踏唐人街被捲入當地黑幫衝突，於是自組華僑會扶善懲惡。《鐵拳英雄》由倉底貨變今年首部播出嘅劇集，亦喺噚晚（10日）首播，而家就同大家睇下網民睇完有咩反應啦！

同《城寨英雄》好相似
噚晚劇情主要講述步天下、連震山（陳山聰飾）、路向東（翟威廉飾）三家去到曼谷唐仁街，三位師傅為咗反抗惡勢力，結果壯烈犧牲。步青雲自此與母親相依為命，仲瞞住母親四處打聽弟妹嘅下落。唔少網民睇完都話同《城寨英雄》好似，仲話不如重播好過，例如「城寨英雄2？」、「好似城寨一開波同袁偉豪果場打果場」、「第一集我覺得普普通通咋噃,故事的套路都好似城寨英雄！」、「同城寨英雄有咩分別」、「直接重播城寨英雄算啦」及「我已經分唔到城寨同呢套」等等。

劇情老土
TVB劇情經常被網民指劇情老土，今次《鐵拳英雄》都唔例如，原因係劇集冇新意及感覺老土，再一次為父母報仇及尋找失蹤兄弟姊妹，網民紛紛留言嫌劇情過於老套，話睇到好尷尬，例如「老套到打冷震」、「又係比人打死哂d老豆老母之後大個報仇？」、「又係d炒冷飯劇情」、「可唔可以唔好咁老土」、「乜X戲 睇到R晒頭」、「難怪放係炮灰檔啦原來...唔多好睇」、「劇情好熟口熟面, 又係照抄照搬, 冇新意」、「劇情老土！特別係啱啱播完愛上我的衰神更加覺！」及「睇咗少少，好X尷尬啊！轉台睇吓it狗先」等等。

陳展鵬潮式口音好難頂
陳展鵬飾演嘅步天下係潮州人士，所以展鵬亦特意扮潮州人口音，不過網民就唔多受落，紛紛留言話好趕客，例如「煎Pan個口音真係好趕客」、「陳展鵬扮潮州佬口音好做作，打拳成個乸型咁」、「煎pan 啲鄉音真係笑X死」及「好心要扮口音都落小小苦功啦 求其講LUR少少就當係」等等。

期待女演員出場
噚晚嗰集出場演員唔多，所以唔少網民都話好期待唐詩詠、王君馨、姚子羚等一眾女演員出場，留言話：「呢套野堆女正 打得應該好睇」、「王君馨好型，諗起花曼。」、「子羚長髮好靚」、「唐姨表哥呢套個造型正喎」、「坐定定等睇」、「約定芊芊今晚930見啦！期待」及「等咗兩年喇！花蔓返嚟喇」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！