《長腿Longlegs》被譽為近十年最恐怖電影 尼古拉斯基治參考阿媽演殺人狂︳電影LOL

今年暑假唔止得動畫片,呢個周末喺北美上映嘅驚慄片《長腿Longlegs》,未上映已經收到大量正評,有影評認為係「十年來最恐怖電影」,而喺Rotten Tomatoes影評網上獲得各地影評正評,一度得過100分滿分,而家都有90分以上,好勁。

Longlegs女主角瑪嘉夢露
Longlegs女主角瑪嘉夢露

《長腿Longlegs》故事描述FBI探員Lee(瑪嘉夢露 飾)奉命調查一樁離奇連環殺人案,案件共通點係受害人家中都有一位14號生日嘅女兒,而且現場無外人闖入痕跡,遇害當天佢地都收到了一尊等身大小陶瓷娃娃……隨著調查進行,Lee意外發現自己同涉嫌犯案嘅連環殺手「長腿」(尼古拉斯基治 飾)有著不尋常的連結……

Longlegs (Black Bear)
Longlegs (Black Bear)

有影評將《長腿Longlegs》同經典犯罪驚慄片《沉默的羔羊》、《觸目驚心》(Psycho)相提並論,而《長》導演兼編劇Osgood Perkins原來就係《觸目驚心》男主角Anthony Perkins個仔!

至於男主角尼古拉斯基治接受訪問時透露,佢媽媽受精神分裂症同嚴重憂鬱症困擾多年,曾經入住專門病院,尼古拉斯基治童年時就成日要去探媽媽。「蛋治」話演繹連環殺手「長腿」時會聯想到媽媽,好想知道係咩原因令媽媽失常。演呢類咁「入心」嘅角色,唔少演員以「方法演技」將自己變成個角色一樣,但係導演話「蛋治」唔駛靠呢套,拍攝期間仍然做返自己,導演仍然可以同佢溝通,果然高手。

呢一下算係見到Nicolas Cage個造型架啦
呢一下算係見到Nicolas Cage個造型架啦

《長腿Longlegs》官方宣傳材料上,一滴尼古拉斯基治都見唔到,令觀眾更恨知道不按牌理出牌嘅「蛋治」會以咩造型演繹連環殺人狂。女主角瑪嘉夢露話,佢去到套戲首映先至第一次見到「蛋治」真人,因為喺片場嘅「蛋治」有晒特技化妝同戲服,似乎暗示咗戲中「長腿」造型同「蛋治」真人有好大出入,應該好有驚喜。

更多電影文章

海關戰線/意外/公開試當真/敢愛咁做/𝗗𝗼𝗹𝗽𝗵𝗶𝗻 躍動人生︳電影LOL 今期睇咩戲

《穿Prada的惡魔》傳拍續集 當年助手變金主 霸氣阿姐點對付?︳電影LOL

派拉蒙落實80億美元賣盤予Skydance 拉鋸多月終成事︳電影LOL

《野孩子》內地電影公布映期後半日撤檔 真正原因眾說紛紜︳電影LOL

《九龍城寨之圍城》逆市破1.1億票房封王 香港戲院上半年票房收入再跌17%︳電影LOL

紙盒藏屍案電影開拍中 Edan呂爵安傳演歐陽炳強?︳電影LOL

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!