《風車草黑心喜劇Di-Dar》載譽歸來 梁祖堯盼有演唱會級舞蹈水準 黃秋生坐鎮喜與Sica一齊玩
《Di-Dar》香港某一間面臨殺校邊緣的中學，財政緊絀，校長走投無路之下，決定弘揚中國文化，在學校硬推中樂，獲取巨大活動資助金吊命。學生反應未如理想，校長聯同訓導主任無計可施之下，決定學生加入中樂團就可換取大過變小過，小過變缺點的優惠。果然吸引到一班壞學生加入。可是一波未平一波又起，學校突然傳出鬧鬼傳聞，女學生言之鑿鑿在校內撞鬼，為防止恐懼蔓延，校長唯有聘請法科師傅在校內舉行驅邪大會。法事進行，當打齋佬吹起猶如號角一般響亮的啲打，竟然燃點起大家內心深處的表演魂。
去年《Di-Dar》於兩個演出場地演出共34場，大獲好評，除了令劇迷為之瘋狂，紛紛自製各式各樣應援物入場欣賞演出之外，更入圍第33屆香港舞台劇獎，包括：喜劇/鬧劇類別最佳導演、最佳男主角、最佳女主角、最佳男配角、最佳女配角，以及最佳製作、最佳音響及最佳填詞合共8項提名，成為去年獲最多提名的舞台劇。今次載譽歸來，再創新猷，除了會重新創作劇中大部分歌曲外，更有秋生及肥仔加盟演出，為一眾劇迷帶來了無限驚喜。在今日的記者會上，阿祖表示希望在4月28日的頒獎禮上可以憑此劇得到最佳導演獎，他說：「因為花咗好多心思喺《Di-Dar》，有娛樂性、好笑又好玩。」Ahdee及阿君則希望獲最佳製作獎，其中Ahdee說：「因為有台前幕後同心合力先做到咁好成績。」阿君則謂：「大家好辛苦去排練，呢個獎屬於每一個人。」
談及二度演出，阿祖介紹道：「今次再多啲歌舞，上次嚇親的話，就要洗乾淨先至好再入場迎接呢件事，因為會嚇到標汗。」阿祖更補充道：「今次換晒所有歌曲，成個編舞亦唔同，我同肥仔講，想要跳到好似佢咁勁，真係唔知邊度嚟嘅勇氣。」肥仔今次扮演阿祖的同學阿成，擅長跳舞。原本阿祖邀請他同時編舞，但他擔心排舞又排戲難以兼顧，所以找來自己的排舞師Ali幫忙，希望能達到阿祖希望期望的演唱會級舞蹈。肥仔透露：「今次係我出道以來第一次演舞台劇，比較緊張，因為好多前輩喺度，加上我係中途加入，驚追唔上進度，所以本住學習心態。舞台劇係演員間碰撞出火花，睇吓到時大家會唔會enjoy我哋玩咩。」
Sica繼上回再次參與《Di-Dar》演出，她十分期待有新火花，特別是舞蹈方面，更笑說：「今次有全新編舞，希望可以再勁啲，上次打側手翻，今次應該可以打側空翻。」至於《Di-Dar》中校長一角，今次找來秋生飾演，他坦言看過葛民輝的演出後心癢癢，吸引他答允演出，秋生又說：「之前同風車草合作過《尋常心》，我個角色比較悶，今次有趣好多，又要跳舞又要唱歌，要瞓棺材又要玩音樂，對我嚟講係一個好大嘅挑戰，我相信對觀眾嚟講都係好大嘅挑戰。另一樣打動我嘅係可以同後生仔一齊玩，就好似點解老人家咁鍾意同啲後生女交往，都係咁嘅原因，但Sica呢啲唔係後生咁簡單，對我嚟講係BB。」
來到記者會尾聲，大會宣布《Di-Dar》中人氣跳唱組合RIP的Fans Club後援會正式成立，而各成員於隊中更肩負起不同崗位，當中秋生成為永遠榮譽會長，阿祖成為隊長，Ahdee擔任主唱，肥仔擔任主舞，而阿君及Sica則分別成為性感擔當及顏值擔當，記者會現場眾人更獲委任狀，RIP Fans Club後援會亦正式成立。
《風車草黑心喜劇Di-Dar (Comeback)》
演出場次：
15-17, 19-24, 26-30.8.2025 [8pm]
16-17, 23-24, 30-31.8.2025 [3pm]
（16/8 3pm、23/8 8pm、24/8 8pm及30/8 8pm為加場場次）
演出地點：
葵青劇院演藝廳
*加場場次將於2025年4月25日（星期五）中午12時起公開發售
