《魷魚遊戲》印度演員「阿里」 擁貴族背景 憑角色爆紅獲家人支持演藝路

由李政宰、朴海秀、魏河俊等主演嘅Netflix原創韓劇《魷魚遊戲》紅遍`全球，成為大家茶餘飯後嘅熱門討論話頭。劇集除咗帶挈三位主角爆紅之外，一眾演員嘅知名度亦都大大提升，當中包括飾演編號199「阿里」嘅印度演員崔帕西阿努潘（Anupam Tripathi），喺劇中佢心地善良又容易信人，原本係一名巴基斯坦嘅非法外籍勞工，被公司拖欠工資導致生活困難，為咗妻兒可以過好生活而參加魷魚遊戲，可惜最終被背叛而遭到淘汰，非常淒慘。唔少網民睇完都好鍾意「阿里」呢個角色，令Anupam人氣急升，IG追蹤人數超過340萬。

現年33歲嘅Anupam喺《魷魚遊戲》中飾演生活艱苦嘅外籍勞工，不過現實生活中嘅佢係有「貴族背景」，仲要係最高級別嘅「婆羅門」出身，於印度新德里長大。Anupam自細就有一個演員夢，不過就得不到父母嘅支持，2006年喺印度以演員身份出道，2010年取得獎學金遠赴韓國進修，其後佢花兩年時間努力學習韓文，及克服文化上嘅差異，第三年開始嘗試好多大大小小嘅試鏡，務求獲得演出機會。Anupam喺2014年開始為唔少劇集及電影演出，例如《太陽的後裔》、《阿斯達年代記》及《國際市場》等等，最終憑《魷魚遊戲》阿里令觀眾留下深刻印象。Anupam就話好感激劇組俾呢次機會佢，現時喺印度嘅屋企都好支持佢嘅演藝發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！